កណ្តាល៖ នៅពេលបច្ចុប្បន្នមានពលរដ្ឋប្រមាណតែជាង ១ម៉ឺននាក់ប៉ុណ្ណោះ មិនទាន់បានទៅចាក់វ៉ាក់សាំងដូសទី១។ សម្រាប់ពលរដ្ឋមិនទាន់បានចាក់វ៉ាក់សាំងនេះ ត្រូវបានក្រុមពេទ្យតាមមណ្ឌលសុខភាព បាននិងកំពុងសហការជាមួយអាជ្ញាធរមូលដ្ឋានចុះស្រាវជ្រាវនៅតាមខ្នងផ្ទះអញ្ជើញគាត់ទៅចាក់វ៉ាក់សំាង សម្រាប់ពលរដ្ឋពិការ មនុស្សចាស់ជរាមិនអាចធ្វើដំណើរបាន ក្រុមគ្រូពេទ្យតាមមណ្ឌលសុខភាព នឹងអញ្ជើញទៅចាក់ដល់ខ្នងផ្ទះគាត់។

វេជ្ជបណ្ឌិត គួយ ប៊ុនធឿន ប្រធានមន្ទីរសុខាភិបាខេត្តកណ្តាល បានថ្លែងប្រាប់BTV នៅថ្ងៃទី២ ខែកុម្ភៈនេះថា ​ដើម្បី​សម្រេច​គោលដៅចាក់វ៉ាក់សាំងកូវីដ១៩ជូនបណ្តាពលរដ្ឋខេត្តកណ្តាល​ឲ្យ​បាន ១០០% បច្ចុប្បន្ន​ក្រុម​ពេទ្យបាន​នឹង​កំពុង​ពង្រីក​ការចាក់នៅតាមបណ្តាមន្ទីរពេទ្យបង្អែក​ និង​បណ្តា​មណ្ឌល​សុខភាពនៅតាមឃុំសង្កាត់​ដែល​ជិត​ខ្នង​ផ្ទះ​ប្រជាពលរដ្ឋ ហើយ​ក៏​មាន​ចាក់នៅ​តាម​បណ្តា​សហគមន៍​ដែលមានការប្រមូលផ្តុំមនុស្សច្រើន ​និង​មានការ​ស្នើ​ចុះ​ពី​អាជ្ញាធរ​មូលដ្ឋាន។

បើតាមវេជ្ជបណ្ឌិត លី មករា ប្រធានមន្ទីរពេទ្យបង្អែកជ័យជំនះ ក្រុងតាខ្មៅថ្លែងថា ​នៅពេលបច្ចុប្បន្ន​មន្ទីរពេទ្យ​បង្អែក​ជ័យជំនះ ​ក៏ដូចមណ្ឌលសុខភាពនានា ​នឹង​មាន​ការចុះចាក់តាមខ្នងផ្ទះនៅ​ក្នុង​មូលដ្ឋាន​ខ្លួន​ ក្នុងករណីអាជ្ញាធរ​ណែនាំ​ថា ​ពលរដ្ឋនោះ​ជាជនពិការនិងជាមនុស្សចាស់ជរាមិនអាច​ធ្វើ​ដំណើរបានទៅឆ្ងាយបាន។

លោកបន្តថា បច្ចុប្បន្នមន្ទីរពេទ្យជ័យជំនះ កំពុងបានក្លាយជាគោលដៅការអញ្ជើញមកចាក់វ៉ាក់​សាំង​ដូសទី១ សម្រាប់​ប្រជាពលរដ្ឋពីតាមបណ្តាស្រុក ​និងតាម​បណ្តា​ខេត្តនានា ​ខណៈពលរដ្ឋនៅក្នុង​តាខ្មៅ ​មានអាយុចាប់ពី៦ឆ្នាំ​ឡើង​រហូតដល់វ័យចាស់គឺបានចាក់វ៉ាក់សាំងរួចហើយបានចំនួន២ដូស ហើយបាននឹងកំពុងបន្តចាក់ដូសទី៣ និង​ដូសទី៤​ ទៀត។

បើតាមពលរដ្ឋដែលទើបមកចាក់វ៉ាក់សាំងដូសទី១នៅថ្ងៃទី២ ខែកុម្ភៈនេះ បានថ្លែងថា ការមិនទាន់​បាន​មក​ចាក់​វ៉ាក់សាំង​ដូសទី១ និងដូសទី២ ក្នុងរយៈពេលជិត២ឆ្នាំកន្លងមក គឺបានធ្វើអោយគេរស់​នៅ​ក្នុង​ភាព​ប្រុងប្រយ័ត្ន ​និងការ​ភ័យ​ខ្លាចនៃការឆ្លងមេរោគកូវីដ១៩ដែលមានការពិបាកព្យាបាល ហើយទោះយ៉ាង​ណា​គេ​ក៏​បាន​អំពាវនាវ​អោយ​ពលរដ្ឋមិនទាន់​ចាក់វ៉ាក់សាំង ឬអ្នកចាក់មិន​បាន​ពេញលេញ គឺត្រូវមកចាក់ឲ្យបានត្រឹមត្រូវទំាងអស់គ្នា ​ដើម្បី​បន្សាំ​នឹងមេរោគកូវីដ១៩។

សូមបញ្ជាក់ថា ​ទូទាំងខេត្តកណ្តាលមានមនុស្សវ័យពី៦ឆ្នាំរហូតដល់ក្រោម១៨ឆ្នាំ បាន​ចាក់វ៉ាក់សាំង២ដូស ​បាន​លើស​ពី១០០% ​ខណៈមនុស្សវ័យចាស់ពីចាស់ពី១៨ឆ្នាំឡើង សរុបជាង ៨៦ម៉ឺននាក់ ជិត១០០% គឺ​បានចាក់​វ៉ាក់សាំង​បានចំនួន២ដូស ហើយ​នៅ​សល់​ប្រមាណជិត ១៥០០០នាក់​នៅមិនទាន់បានចាក់វ៉ាក់សាំង៕អត្ថបទ ស៊ុម សុខជា.