សមាជិកសភាអាហ្សង់ទីន កាលពីថ្ងៃព្រហស្បតិ៍ (ទី២ ខែតុលា) បានលុបចោលសិទ្ធិវេតូចំនួន ២ របស់លោកប្រធានាធិបតី Javier Milei ដែលជាការប៉ះពាល់ដ៏ធំដល់មេដឹកនាំសេរីនិយម នៅមុនការបោះឆ្នោតសភា សំខាន់ៗដែលអាចកំណត់អនាគតនៃរបៀបវារៈកំណែទម្រង់សេដ្ឋកិច្ចរបស់លោក។

ព្រឹទ្ធសភាដែលគ្រប់គ្រងដោយគណបក្សប្រឆាំង បានបោះឆ្នោតយ៉ាងលើសលប់ ដើម្បីបដិសេធសេចក្ដីស្នើច្បាប់វេតូរបស់លោក Milei ដែលជំរុញការផ្តល់មូលនិធិ សម្រាប់សាកលវិទ្យាល័យសាធារណៈ និងសេវាថែទាំសុខភាពកុមារ ជាមួយនឹងសំឡេងឆ្នោតល្អៀងគ្នាបន្តិច ៥៩-៧ និង ៥៨-៧។

លោក Milei ដែលបានអនុវត្តគោលនយោបាយតឹងរ៉ឹង ក្នុងការកាត់បន្ថយទំហំរដ្ឋាភិបាល បាននិយាយថា ការចំណាយថ្មី នឹងប៉ះពាល់ដល់តុល្យភាពសារពើពន្ធរបស់ប្រទេសអាហ្សង់ទីន។

កាលពីខែកញ្ញា ស្ថាប័នអង្គនីតិបញ្ញាត្តរបស់ប្រទេសអាហ្សង់ទីន ជាលើកដំបូង បានលុបចោលសិទ្ធិវេតូដែលចេញដោយលោក Milei ដោយបានស្ដារឡើងវិញនូវសេចក្ដីស្នើច្បាប់ដែលបង្កើនការចំណាយ សម្រាប់ជនមានពិការភាព។

វាជាពេលវេលាដ៏រង្គោះរង្គើមួយ សម្រាប់លោក Milei ខណៈដែលប្រទេសនេះរៀបចំការបោះឆ្នោតពាក់កណ្តាលអាណត្តិ នៅថ្ងៃទី២៦ ខែតុលា ហើយប្រជាប្រិយភាពរបស់មេដឹកនាំអាហ្សង់ទីនរូបនេះ បានធ្លាក់ចុះនៅចំពោះមុខរឿងអាស្រូវពុករលួយ និងការធុញទ្រាន់ជាសាធារណៈ ដោយសារវិធានការតឹងរ៉ឹងរបស់លោក៕