ប្រមុខកងទ័ពអាកាសឥណ្ឌា លោក Amar Preet Singh នៅថ្ងៃសុក្រ (ទី៣ ខែតុលា) នេះ បានប្រាប់ឲ្យដឹងថា ឥណ្ឌាបានបាញ់ទម្លាក់យន្តហោះចម្បាំងប៉ាគីស្ថានប្រភេទ F-16 និង JF-17 ចំនួន ៥គ្រឿង ក្នុងអំឡុងពេលមានការប្រយុទ្ធគ្នាយ៉ាងខ្លាំងក្លា រវាងប្រទេសជិតខាងប្រដាប់អាវុធនុយក្លេអ៊ែរទាំង២ កាលពីខែឧសភា។

ទោះបីជាលោក Singh ធ្លាប់បាននិយាយថា យន្តហោះចម្បាំងប៉ាគីស្ថានចំនួន ៥គ្រឿង និងយន្តហោះយោធាផ្សេងទៀត ត្រូវបានបាញ់ទម្លាក់ ក្នុងអំឡុងពេលមានជម្លោះនោះក៏ដោយ ក៏នេះគឺជាលើកដំបូងហើយ ដែលទីក្រុងញូវដេលីបានលើកឡើង អំពីប្រភេទយន្តហោះទាំងនោះជាសាធារណៈ។

នៅឯសន្និសីទសារព័ត៌មានរបស់កងទ័ពអាកាសឥណ្ឌា ដែលធ្វើឡើងម្ដងក្នុង ១ឆ្នាំ លោក Singh បានប្រាប់អ្នកសារព័ត៌មានថា៖ «ពាក់ព័ន្ធនឹងផ្នែកការពារដែនអាកាស យើងមានភស្តុតាងនៃការវាយប្រហាររយៈចម្ងាយឆ្ងាយ រួមជាមួយយន្តហោះចម្បាំង ៥គ្រឿង ជាយន្តហោះចម្បាំងបច្ចេកវិទ្យាខ្ពស់ ប្រភេទ F-16 និង JF-17 ដែលប្រព័ន្ធរបស់យើងបង្ហាញឲ្យដឹង»។

F-16 គឺជាយន្តហោះចម្បាំងផលិតនៅសហរដ្ឋអាមេរិក ខណៈ JF-17 មានប្រភពពីប្រទេសចិន។ យោធាប៉ាគីស្ថានមិនបានឆ្លើយតបភ្លាមៗនោះឡើយ ចំពោះសំណើរបស់សារព័ត៌មានរ៉យទ័រ សម្រាប់ការសុំការអត្ថាធិប្បាយ។ 

ចំណែកប៉ាគីស្ថានបានបញ្ជាក់ថា ខ្លួនបានបាញ់ទម្លាក់យន្តហោះចម្បាំងឥណ្ឌា ៦គ្រឿង អំឡុងជម្លោះនោះ ក្នុងរួមមានទាំងយន្តហោះ Rafale ផលិតដោយបារាំងផងដែរ។ ឥណ្ឌាបានទទួលស្គាល់ការខាតបង់មួយចំនួន ប៉ុន្តែបានបដិសេធពីការបាត់បង់យន្តហោះ ៦គ្រឿងនោះ។ ហើយនៅថ្ងៃសុក្រនេះ លោក Singh បានបដិសេធមិនឆ្លើយតបនឹងសំណួរ អំពីការអះអាងរបស់ប៉ាគីស្ថាន ក្នុងការបាញ់ទម្លាក់យន្តហោះឥណ្ឌានោះដែរ។

គួរបញ្ជាក់ថា ការប្រយុទ្ធកាលពីខែឧសភា ដែលជាការប្រយុទ្ធដ៏អាក្រក់បំផុត រវាងគូសត្រូវចាស់ទាំង ក្នុងទសវត្សរ៍នេះ ត្រូវបានបង្កឡើងដោយការវាយប្រហារលើអ្នកទេសចរហិណ្ឌូ ក្នុងតំបន់ Kashmir គ្រប់គ្រងដោយឥណ្ឌា ដែលទីក្រុងញូវដេលី បានលើកឡើងថា គាំទ្រដោយប៉ាគីស្ថាន តែទីក្រុងអ៊ីស្លាម៉ាបាដ បានបដិសេធមិនមានពាក់ព័ន្ធណាមួយឡើយ៕