ភ្នំពេញ ៖ អ្នកជំនាញវិស័យគណនេយ្យ និងសវនកម្ម ថា ការប្រែប្រួល និងការរីកចម្រើនក្នុងវិស័យគណនេយ្យ និងសវកម្ម បានឆ្លើយតបទៅនិង ការវិវត្តសេដ្ឋកិច្ច និងតម្រូវការអាជីវកម្ម តាមដំណាក់កាលសំខាន់ៗ ខណៈការរីកចម្រើនក្នុងវិស័យបច្ចេកវិទ្យាឌីជជីថល បាននិងកំពុងជួយ គាំទ្រដល់ការរីកលូតលាស់នៃវិស័យនេះ។

​លោកស្រី នាង បូនី អគ្គនាយករងនៃនិយ័តករគណនេយ្យ និងសវនកម្ម នៃសេវាអាជ្ញាធរសេវាហិរញ្ញវត្ថុមិនមែនជាធនាគារ លើក ឡើងក្នុងពិធីប្រគល់បណ្ណសរសើរ និងមេដាយ ដល់និស្សិតឆ្នើម នៅថ្ងៃទី៣ ខែតុលា ឆ្នាំ២០២៥ នេះថា ជុំវិញវិស័យគណនេយ្យ និងសវន កម្មនេះ គណៈកម្មការគ្រប់គ្រងវិធីសិក្សាគណនេយ្យករជំនាញកម្ពុជា បានរៀបចំផែនការអភិវឌ្ឍកម្មវិធីសិក្សារយៈពេល៥ឆ្នាំ ២០២៥- ២០៣០ នៅក្នុងផែនការអភិវឌ្ឍគណនេយ្យករជំនាញកម្ពុជា ដោយបានកំណត់គោលដៅចម្បង គឺជំរុញបង្កើតចំនួនសិស្ស-និស្សិតឱ្យ បញ្ចប់កម្មវិធីសិក្សានេះ ឱ្យដល់ ១ពាន់នាក់ ត្រឹមឆ្នាំ២០៣០, ក្នុងនោះជាយុទ្ធសាស្រ្ត គឺការរផ្តល់ទៅលើ៦ចំណុចសំខាន់ៗគឺ៖ ការពង្រឹង អភិបាលកិច្ចនិងការត្រួតពិនិត្យ, ការអភិវឌ្ឍសមត្ថភាព ក៏ដូចជាហេដ្ឋារចនាសម្ព័ន្ធ, ការពង្រឹងកម្មវិធីសិក្សានិងគុណវុឌ្ឍ, នវានុវត្ត និងការ សិក្សាបែបឌីថល, ការចូលរួមពីគ្រប់តួអង្គពាក់ព័ន្ធនៅក្នុងវិស័យ, និងការទទួលស្គាល់ជាអន្តរជាតិនៅលើកម្មវិធីសិក្សានេះ។

លោកស្រី បន្ថែមថា កម្មវិធីសិក្សាគណនេយ្យករជំនាញនេះ តាក់តែងឡើងគឺមានការទទួលស្គាល់ជាអន្តរជាតិ ដោយទទួលបាន ជំនួយបច្ចេកទេសពីស្ថាប័នចក្រភពអង់គ្លេស ដើម្បីធានាបានថា កម្មវិធីសិក្សានេះអាចប្រកួតប្រែងក្នុងស្រុក ក៏ដូចអន្តរជាតិ ក្នុងនោះកម្ពុជា ក៏បានចុះអនុស្សាណៈក្រោមក្របខណ្ឌអាស៊ានផងដែរ ដើម្បីឱ្យគណនេយ្យករ និងសវនករធ្វើការនៅក្នុងអាស៊ានទាំង១០ ខណៈបច្ចុប្បន្ន កម្ពុជាមានគណនេយ្យករនិងសវនករ ចំនួន ២៤ រូប។ បញ្ហានេះ ស្របពេលវិស័យបច្ចេកវិទ្យាឌីជជីថលកំបុងរីកចចម្រើន បាននិងកំពុង ជួយគាំទ្រដល់ការរីកលូតលាស់នៃវិស័យគណនេយ្យ និងសវនកម្មផងដែរ។

ជុំវិញបញ្ហានេះដែរ, លោក ប៊ុន សុន្ទរង្គ នាយកវិទ្យាស្ថានហិរញ្ញវត្ថុ និងគណនេយ្យ លើកឡើងនូវការអភិវឌ្ឍជំនាញជាច្រើន ដែលសិស្ស-និស្សិតត្រូវការសិក្សា ដើម្បីចាប់យកឱ្យទាន់បរិបថនៃការរីកចចម្រើន ឆ្លើយតបទៅនិងតម្រូវការទីផ្សារការងារ ខណៈកម្ពុជា កំពុងទទួលបានឱកាសវិនិយោគជាបន្ត បន្ទាប់។ លោក បន្តថា ស្ថិតនៅបរិបឋថ្មីនេះ ជំនាញសតវត្សទី២១ គឺនិស្សិតត្រូវតែចេះ មានដូចជា Learning Skill, Communication, Public speaking, Emotional management ជាដើម ក្រៅពីនេះមានជំនាញពិសេសផ្សេងៗ ទៀតដែលយើងគួរសិក្សារៀនសូត្របន្ថែម។

សូមបញ្ជាក់ថា វិស័យគណនេយ្យ និងសវនកម្ម បានចាប់ផ្តើមមានសញ្ញាណនៃការវិវត្តក្នុងអំឡុងឆ្នាំ១៩៩៩ ក្រោយពីសម្តេចអគ្គមហា សេនាបតីតេជោ ហ៊ុន សែន អតីតនាយករដ្ឋមន្រ្តីនៃព្រះរាជាណាចក្រកម្ពុជា អញ្ជើញមាតុភូមិនិវត្តពីក្រៅប្រទេស ផ្តើមចេញពីនោះ គណៈកម្មការស្រាវជ្រាវស្តង់ដាគណនេយ្យអន្តរជាតិ ត្រូវបានបង្កើតឡើងដែលមានឯកឧត្តម ងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុជាប្រធាន។ ជាលទ្ធផល, ច្បាប់ស្តីពីគណនេយ្យសហគ្រាស សវនកម្ម គណនេយ្យសហគ្រាស និងវិជ្ជាជីវៈគណនេយ្យ ត្រូវបានអនុម័ត និងដាក់ឱ្យអនុវត្តនៅឆ្នាំ២០០២ ក្នុងនោះស្ថាប័នពីរត្រូវបានបង្កើតឡើង គឺក្រុមប្រឹក្សាជាតិគណនេយ្យ ដែលជាស្ថាប័ន បញ្ញត្តិករ និងវិទ្យាស្ថានគណនេយ្យករជំនាញ និងសវនករកម្ពុជាជាស្ថាប័នវិជ្ជាជីវៈ៕

អត្ថបទ៖ សុន រ៉ាឌី