រុស្សីបានធ្វើការវាយប្រហារដ៏ធំបំផុតរបស់ខ្លួន ពេញមួយយប់ លើបណ្តាញឧស្ម័នរបស់ប្រទេសអ៊ុយក្រែន គិតចាប់តាំងពីទីក្រុងមូស្គូ បានលុកលុយជាលើកដំបូង ក្នុងឆ្នាំ២០២២។ នេះបើតាមការឲ្យដឹងពីប្រតិបត្តិករឧស្ម័នរដ្ឋរបស់ទីក្រុងគីវ នាថ្ងៃសុក្រ (ទី៣ ខែតុលា) នេះ។

យោធារបស់ទីក្រុងមូស្គូ បានកំណត់គោលដៅបណ្តាញថាមពលរបស់អ៊ុយក្រែនឥតឈប់ឈរ ជាការវាយប្រហារបន្តបនា្ទប់ពេញមួយយប់ ដែលជួនកាលបានធ្វើឲ្យមនុស្សរាប់លាននាក់ធ្លាក់ចូលទៅក្នុងភាពងងឹត និងកាត់ផ្តាច់ការផ្គត់ផ្គង់ឧស្ម័នសម្រាប់កម្ដៅ ខណៈដែលសីតុណ្ហភាពចុះត្រជាក់ក្រោមសូន្យ។

ក្រុមហ៊ុនឧស្ម័នរដ្ឋរបស់អ៊ុយក្រែន Naftogaz បានឲ្យដឹងនៅក្នុងសេចក្តីថ្លែងការណ៍មួយថា៖ «សត្រូវបានធ្វើការវាយប្រហារដ៏ធំបំផុតលើហេដ្ឋារចនាសម្ព័ន្ធផលិតកម្មឧស្ម័នជាលើកដំបូង ចាប់តាំងពីសង្គ្រាមចាប់ផ្តើម»។ ប្រធានក្រុមហ៊ុន Naftogaz លោក Sergiy Koretsky បាននិយាយថា៖ «ជាលទ្ធផលនៃការវាយប្រហារនេះ ផ្នែកសំខាន់មួយនៃរោងចក្ររបស់យើងត្រូវបានខូចខាត។ ការខូចខាតមួយចំនួន គឺធ្ងន់ធ្ងរ»។

សេចក្តីរាយការណ៍បានបន្ថែមថា មីស៊ីលប្រហែល ៣៥គ្រាប់ និងយានដ្រូន ៦០គ្រឿង ត្រូវបានបាញ់សំដៅទីតាំងរបស់ក្រុមហ៊ុន នៅក្នុងតំបន់ Kharkiv ភាគឦសាន និងតំបន់ Poltava ភាគកណ្តាល។ សេចក្ដីថ្លែងការណ៍បានបញ្ជាក់ទៀតថា៖ «មីស៊ីល និងយានដ្រូនខ្លះត្រូវបានបាញ់ទម្លាក់ដោយជោគជ័យ។ តែគួរឲ្យសោកស្ដាយណាស់ មិនមែនទាំងអស់នោះទេ»។

ចំណែកក្រសួងថាមពលរបស់អ៊ុយក្រែន បានឲ្យដឹងថា មានការដាច់ចរន្តអគ្គិសនី នៅក្នុងតំបន់ជាច្រើន ប៉ុន្តែមិនបានផ្តល់ព័ត៌មានលម្អិតបន្ថែមនោះឡើយ៕