រដ្ឋបាលរបស់ប្រធានាធិបតីសហរដ្ឋអាមេរិក លោក Donald Trump បានបង្កកមូលនិធិឆ្លងកាត់ទីក្រុងឈីកាហ្គោចំនួន២,១ពាន់លានដុល្លារ កាលពីថ្ងៃសុក្រ ទី៣ ខែតុលា ដោយធ្វើបាត់បង់មូលនិធិក្រុងមួយផ្សេងទៀតគ្រប់គ្រងដោយគណបក្សប្រជាធិបតេយ្យ ជាបំណងដើម្បីបញ្ចប់ការបិទរដ្ឋាភិបាលដែលបានបរាជ័យម្តងទៀតនៅក្នុងព្រឹទ្ធសភា។

នៅថ្ងៃទីបីនៃការបិទរដ្ឋាភិបាល លោក Trump បានបង្កើនសម្ពាធលើគណបក្សប្រជាធិបតេយ្យ ដើម្បីបញ្ចប់ការប្រឈមមុខដាក់គ្នា និងព្រមព្រៀងចំពោះផែនការរបស់គណបក្សសាធារណរដ្ឋ ដែលនឹងស្តារឡើងវិញមូលនិធិរបស់រដ្ឋាភិបាល។

នៅវិមាន Capitol Hill ព្រឹទ្ធសភាបានច្រានចោលទាំងផែនការផ្តល់មូលនិធិរបស់គណបក្សសាធារណរដ្ឋ និងជម្រើសរបស់គណបក្សប្រជាធិបតេយ្យ ហើយក្រោយមកបានពន្យារពេលរហូតដល់ថ្ងៃច័ន្ទ។

យុទ្ធនាការដាក់សម្ពាធរបស់លោក Trump មិនទំនងជាធ្វើឲ្យគណបក្សប្រជាធិបតេយ្យមានឥទ្ធិពលទេ។ គណបក្សប្រជាធិបតេយ្យ ចង់ឱ្យគណបក្សសាធារណរដ្ឋ ស្តារឡើងវិញនូវការឧបត្ថម្ភធនថែទាំសុខភាពសម្រាប់ពលរដ្ឋអាមេរិកមានប្រាក់ចំណូលទាបដែលត្រូវបានដកចេញពីកម្មវិធីសុខភាព ACA របស់រដ្ឋាភិបាលនៅក្នុងសេចក្តីស្នើច្បាប់ចំណាយដែលដឹកនាំដោយគណបក្សសាធារណរដ្ឋ កាលពីដើមឆ្នាំនេះ។ ប្រសិនបើការបិទរដ្ឋាភិបាល អូសបន្លាយរហូតដល់ថ្ងៃច័ន្ទ វានឹងក្លាយទៅជារយៈពេលវែងបំផុតលើកទីបួនក្នុងប្រវត្តិសាស្ត្រសហរដ្ឋអាមេរិក។ ការបិទរដ្ឋាភិបាលរយៈពេលយូរបំផុតមានរយៈពេល៣៥ថ្ងៃនៅក្នុងឆ្នាំ ២០១៨-២០១៩ ក្នុងអំឡុងអាណត្តិកាន់តំណែងដំបូងរបស់លោក Trump។