ទីភ្នាក់ងារការពារជនស៊ីវិលរបស់តំបន់ហ្កាហ្សា បាននិយាយនៅថ្ងៃសៅរ៍ថា អ៊ីស្រាអែល បានធ្វើការវាយប្រហារតាមអាកាស និងការបាញ់ផ្លោងរាប់សិបគ្រាប់ទៅលើទីក្រុងហ្កាហ្សា ទោះបីជាមានការអំពាវនាវរបស់ប្រធានាធិបតីអាមេរិក លោក ដូណាល់ ត្រាំ ឲ្យបញ្ចប់ការវាយប្រហារ បន្ទាប់ពីក្រុមហាម៉ាស បានទទួលយកកិច្ចព្រមព្រៀងបទឈប់បាញ់ក៏ដោយ។

អ្នកនាំពាក្យអង្គភាពការពារជនស៊ីវិល លោក Mahmud Bassal បានប្រាប់សារព័ត៌មាន AFP ថា៖«នោះគឺជាយប់ដ៏ហិង្សាមួយ ដែលក្នុងអំឡុងពេលនោះ (កងទ័ពអ៊ីស្រាអែល) បានធ្វើការវាយប្រហារតាមអាកាស និងការបាញ់ផ្លោងរាប់សិបគ្រាប់ លើទីក្រុងហ្កាហ្សា និងតំបន់ផ្សេងទៀតក្នុងស្ទ្រីប ទោះបីជាមានការអំពាវនាវរបស់លោកប្រធានាធិបតី ត្រាំ ឲ្យបញ្ឈប់ការវាយប្រហារក៏ដោយ»។

លោក Bassal ដែលភ្នាក់ងាររបស់លោក ជាកម្លាំងជួយសង្គ្រោះដែលប្រតិបត្តិការនៅក្រោមអាជ្ញាធរហាម៉ាស បានបន្ថែមថា ផ្ទះចំនួន ២០ខ្នង ត្រូវបានបំផ្លាញ នៅក្នុងការទម្លាក់គ្រាប់បែកពេញមួយយប់៕