សំឡេងផ្ទុះគ្រាប់ ត្រូវបានគេឮ និងផ្សែងហុយឡើងពេញតំបន់ហ្កាហ្សា នៅពេលព្រឹកព្រលឹមថ្ងៃសៅរ៍ (ទី៤ ខែតុលា)នេះ បន្ទាប់ពីក្រុមហាម៉ាស បានយល់ព្រមដោះលែងចំណាប់ថ្នូរ និងទទួលយកលក្ខខណ្ឌមួយចំនួនផ្សេងទៀត នៅក្នុងផែនការរបស់សហរដ្ឋអាមេរិក ដើម្បីបញ្ចប់សង្រ្គាមជាមួយអ៊ីស្រាអែល។

លោកប្រធានាធិបតី Donald Trump បានប្រាប់អ៊ីស្រាអែល កាលពីថ្ងៃសុក្រ (ទី ០៣ ខែតុលា) ឲ្យបញ្ឈប់ជាបន្ទាន់នូវការទម្លាក់គ្រាប់បែកលើតំបន់ហ្កាហ្សសា បន្ទាប់ពីការឆ្លើយតបរបស់ក្រុមហាម៉ាស ប៉ុន្តែបញ្ហាដ៏ក្តៅគគុកដូចជាការរំសាយអាវុធ ហាក់ដូចជាមិនទាន់ត្រូវបានដោះស្រាយឡើយ។

ការិយាល័យរបស់នាយករដ្ឋមន្ត្រីអ៊ីស្រាអែលលោក Benjamin Netanyahu បាននិយាយថា អ៊ីស្រាអែលកំពុងរៀបចំសម្រាប់ «ការអនុវត្តភ្លាមៗ» នៃដំណាក់កាលដំបូងនៃផែនការហ្កាហ្សារបស់លោក Trump សម្រាប់ការដោះលែងចំណាប់ថ្នូរអ៊ីស្រាអែល បន្ទាប់ពីការឆ្លើយតបរបស់ក្រុមហាម៉ាស។ បន្តិចក្រោយមក ប្រព័ន្ធផ្សព្វផ្សាយអ៊ីស្រាអែល បានរាយការណ៍ថា ឥទ្ធិពលនយោបាយរបស់ប្រទេសនេះ បានណែនាំយោធាឲ្យកាត់បន្ថយសកម្មភាពវាយលុកនៅតំបន់ហ្កាហ្សា។

ក្រុមហាម៉ាសជាក្រុមសកម្មប្រយុទ្ធប៉ាឡេស្ទីន ដែលគ្រប់គ្រងតំបន់ហ្កាហ្សា បានឆ្លើយតបទៅនឹងផែនការ ២០ចំណុចរបស់លោក Trump បន្ទាប់ពីប្រធានាធិបតីសហរដ្ឋអាមេរិក បានផ្តល់ឲ្យក្រុមនេះរហូតដល់ថ្ងៃអាទិត្យ (ទី ៥ ខែតុលា) ដើម្បីទទួលយក បើមិនដូច្នេះទេ ត្រូវប្រឈមមុខនឹងផលវិបាកដ៏ធ្ងន់ធ្ងរ៕