ក្រសួងការបរទេសទីក្រុងកាប៊ុល បានបញ្ជាក់ប្រាប់សារព័ត៌មាន AFP នៅថ្ងៃសៅរ៍នេះថា រដ្ឋមន្ត្រីការបរទេសតាលីបង់នៃប្រទេសអាហ្វហ្គានីស្ថាន នឹងធ្វើទស្សនកិច្ចនៅប្រទេសឥណ្ឌា ក្នុងខែនេះ បន្ទាប់ពី     គណៈកម្មាធិការក្រុមប្រឹក្សាសន្តិសុខអង្គការសហប្រជាជាតិ បានដកបម្រាមធ្វើដំណើរជាបណ្តោះអាសន្ន។

លោក Amir Khan Muttaqi នឹងក្លាយជាមេដឹកនាំតាលីបង់ជាន់ខ្ពស់ដំបូងគេ ដែលធ្វើទស្សនកិច្ចនៅប្រទេសឥណ្ឌា ចាប់តាំងពីពួកគេ បានឡើងកាន់អំណាចក្នុងឆ្នាំ ២០២១ បន្ទាប់ពីការដកទ័ពរបស់សហរដ្ឋអាមេរិក។

ក្រសួងការបរទេស បានប្រាប់ AFP ថា លោករដ្ឋមន្ត្រី នឹងធ្វើដំណើរទៅប្រទេសឥណ្ឌា «បន្ទាប់ពីកិច្ចប្រជុំកំពូលនៅទីក្រុងមូស្គូ នៅថ្ងៃទី ០៧ ខែតុលា ដែលរួមមានតំណាងមកពីប្រទេសចិន ឥណ្ឌា អ៊ីរ៉ង់ និងប្រជាជាតិអាស៊ីកណ្តាល។

គណៈកម្មាធិការក្រុមប្រឹក្សាសន្តិសុខអង្គការសហប្រជាជាតិ បានផ្តល់ការលើកលែងចំពោះការហាមឃាត់ការធ្វើដំណើរលើលោក Muttaqi ដែលស្ថិតនៅក្រោមការដាក់ទណ្ឌកម្មរបស់អង្គការសហប្រជាជាតិ ដើម្បីអនុញ្ញាតឲ្យលោកទៅបំពេញទស្សនកិច្ច នៅទីក្រុង New Delhi ពីថ្ងៃទី ០៩ និង១៦ ខែតុលានេះ៕