កំពង់ធំ៖ នៅថ្ងៃម្សិលមិញនេះ តំបន់ប្រតិបត្តិការសឹករងកំពង់ធំ បើកកិច្ចប្រជុំ ត្រៀមក្រុមគ្រូពេទ្យ និងក្រុមការងាររៀបចំទីតាំង និងបែងចែកភារកិច្ចត្រៀមចាក់វ៉ាក់សាំងការពារជំងឺកូវីដ១៩ ជូនយោធិន គ្រួសារយោធិន និងសមាជិកសមាគមអតីតយុទ្ធជនកម្ពុជា ខេត្តកំពង់ធំប្រមាណជាង ៤០០០នាក់។

ក្នុងកិច្ចប្រជុំនោះ លោកឧត្តមសេនីយ៍ទោ សោម ស៊ុន មេបញ្ជាការ តំបន់ប្រតិបត្តិការសឹករងកំពង់ធំ ថ្លែងអំណរគុណក្រុមការងារ និងក្រុមគ្រូពេទ្យចាក់វ៉ាក់សាំង​នៃបញ្ជាការដ្ឋានតំបន់​ប្រតិបត្តិការសឹក​រង​កំពង់ធំ ដែល​បានបំពេញភារកិច្ចប្រកបដោយបទពិសោធន៍ និងមិនខ្លាចនឿយហត់​ ដើម្បីចាក់វ៉ាក់សាំងជូនយោធិន គ្រួសារយោធិន មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋនៅក្នុងខេត្តកំពង់ធំ និងខេត្តសៀមរាប នាពេលកន្លងមក ។

លោក បន្តថា កិច្ចការងារបន្ទាប់នេះ គឺជាពេលវេលាដែលត្រូវបន្តការអនុវត្តតាម​អនុសាសន៍​ប្រមុខ​រាជរដ្ឋាភិបាល លើភារកិច្ចសំខាន់ៗបន្តទៀត​ ដែលក្រុមការងារ​ និងក្រុមគ្រូពេទ្យមានជាអាទិ៍ គឺ​ត្រូវ​រៀបចំ​ក្រុមការងារ​ និងក្រុមគ្រូពេទ្យ បែងចែកជាក្រុមដើម្បីទទួលខុសត្រូវ​តាម​ភារៈកិច្ចនីមួយៗ​ឲ្យបានច្បាស់លាស់​ និងមានប្រសិទ្ធភាព, ត្រូវរៀបចំទីកន្លែងថែរក្សាទុកដាក់​និងរៀបចំ​តុ​ចាក់​វ៉ាក់សាំង នៅ​គិលានដ្ឋាន​នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ឲ្យបានល្អស្របតាម​លក្ខណៈបច្ចេកទេស និងវិធានការរបស់ក្រសួងសុខាភិបាល និងត្រូវលើកផែនការកម្មវិធី​ច្បាស់លាស់​ក្នុង​ការចាក់​វ៉ាក់សាំង​តាម​លំដាប់​លំដោយ​ជូនយោធិន​ គ្រួសារយោធិន និង​បងប្អូន​អតីតយុទ្ធជន ​ឲ្យបានគ្រប់គ្នា ​និងធានាបានសុវត្ថិភាព ស្របតាមរបស់អនុគណៈកម្មការចំពោះ​កិច្ច​ចាក់វ៉ាក់​សាំង របស់ក្រសួងការពារជាតិផងដែរ ៕