កាលពីថ្ងៃសៅរ៍ម្សិលមិញ ក្រុមបាតុករនៅក្នុងទីក្រុងតែល អាវីវ នាំគ្នាដង្ហែរក្បនតាមដងផ្លូវ ជំរុញឲ្យរដ្ឋាភិបាលទទួលបានកិច្ចព្រមព្រៀង និងបញ្ចប់សង្រ្គាមនៅតំបន់ហ្កាហ្សា ក៏ដូចជានាំចំណាប់ថ្នូរទាំងអស់វិលត្រឡប់មកផ្ទះវិញ ។

បាតុករអ៊ីស្រាអែលមួយចំនួន បានបង្ហាញក្តីបារម្ភចំពោះនាយករដ្ឋមន្រ្តីអ៊ីស្រាអែលលោក Benjamin Netanyahu ដោយពួកគេនិយាយថា លោកអាចនឹងបំផ្លាញកិច្ចព្រមព្រៀង ដូចដែលរូបលោកធ្លាប់បានធ្វើកាលពីមុន ប៉ុន្តែពួកគេបានបង្ហាញក្តីសង្ឃឹមផងដែរថា ពេលនេះកិច្ចព្រមព្រៀងនឹងឆ្លងផុត ។

អ្នកស្រី Gil Shelly គឺជាបាតុករមួយរូបមកពីទីក្រុងតែល អាវីវ និយាយថា ពួកយើងអន្ទះសារឲ្យចំណាប់ថ្នូរដោះលែងមកវិញ ។ ពួកយើងអន្ទះសារឲ្យបញ្ឈប់សង្រ្គាមមួយនេះ ពួកយើងគ្មានទំនុកចិត្តនោះទេលើលោក Benjamin Netanyahu ប៉ុន្តែឥឡូវពួកយើងមានទំនុកចិត្តលើពិភពលោក លើលោក Trump ។

កាលពីថ្ងៃសុក្រកន្លងទៅ ក្រុមហាម៉ាសដែលគ្រប់គ្រងតំបន់ហ្កាហ្សា បានទទួលយកផ្នែកសំខាន់ៗនៃផែនការរបស់ប្រធានាធិបតីសហរដ្ឋអាមេរិកលោក Donald Trump រួមទាំងការបញ្ចប់សង្រ្គាម ការដកទ័ពអ៊ីស្រាអែល និងការដោះលែងចំណាប់ថ្នូរអ៊ីស្រាអែល និងអ្នកទោសប៉ាឡេស្ទីន ។

ការវាយប្រហារតាមច្រកអាកាសរបស់អ៊ីស្រាអែលនៅតែបន្តមានកាលពីព្រឹកថ្ងៃសៅរ៍ ប៉ុន្តែមានលក្ខណៈថមថយជាងមុន ក្រោយលោក Trump អំពាវនាវឲ្យបញ្ឈប់ការទម្លាក់គ្រាប់បែក ដោយលោកនិយាយថា ក្រុមហាម៉ាស ត្រៀមខ្លួនរួចរាល់សម្រាប់សន្តិភាព ៕