ប្រភពវេជ្ជសាស្រ្តបានឲ្យដឹងថា ការវាយប្រហាររបស់អ៊ីស្រាអែលនៅទូទាំងតំបន់ហ្កាហ្សាស្រ្ទីប បានសម្លាប់ជនប៉ាឡេស្ទីនយ៉ាងហោច ៧០នាក់ បើទោះបីជាមានការអំពាវនាវពីប្រធានាធិបតីសហរដ្ឋអាមេរិកលោក Donald Trump ឲ្យអ៊ីស្រាអែលបញ្ឈប់ការទម្លាក់គ្រាប់បែកក៏ដោយ ក្រោយពេលក្រុមហាម៉ាសនិយាយថា ពួកគេព្រមទទួលយកចំណុចមួយចំនួននៅក្នុងផែនការ ២០ចំណុចរបស់លោក ដើម្បីបញ្ចប់សង្រ្គាមអ៊ីស្រាអែល ។

ជនរងគ្រោះយ៉ាងហោច ៤៥នាក់ដែលត្រូវបានសម្លាប់នៅក្នុងការទម្លាក់គ្រាប់បែក និងការវាយប្រហារតាមច្រកអាកាសរបស់អ៊ីស្រាអែល ស្ថិតនៅក្នុងទីក្រុងហ្កាហ្សា ជាទីដែលកងទ័ពអ៊ីស្រាអែលបង្កើនការវាយប្រហាររបស់ពួកគេក្នុងរយៈពេលជាច្រើនសប្តាហ៍កន្លងមកនេះ ដោយបង្ខំឲ្យមនុស្សមួយចំនួនក្នុងចំណោមពលរដ្ឋ ១លាននាក់ រត់ភៀសខ្លួនទៅកាន់តំបន់ភាគខាងត្បូងដែលមានជនប៉ាឡេស្ទីនច្រើនលើសចំណុះរួចទៅហើយ ។

គ្រូពេទ្យបឋម និយាយថា មនុស្ស ១៨នាក់ ត្រូវបានសម្លាប់ និងមនុស្សជាច្រើននាក់ផ្សេងទៀត បានរងរបួស នៅក្នុងការវាយប្រហាររបស់អ៊ីស្រាអែលលើផ្ទះមួយខ្នង ស្ថិតក្នុងសង្កាត់ Tuffah នៅទីក្រុងហ្កាហ្សា ។ ការវាយប្រហារនេះដែរ បណ្តាលឲ្យអគារក្បែរគ្នារងការខូចខាតផងដែរ ។

នៅក្នុងសេចក្តីថ្លែងការណ៍ចែករំលែកលើបណ្តាញព័ត៌មានសង្គម Telegram ទីភ្នាក់ងារការពារជនស៊ីវិលហ្កាហ្សា និយាយថា កុមារអាយុចន្លោះ ២ខែ ដល់ ៨ឆ្នាំ ស្ថិតក្នុងចំណោមមនុស្សដែលត្រូវបានសម្លាប់ ។

កងកម្លាំងអ៊ីស្រាអែល មានគោលដៅផងដែរលើជំរំជម្លៀសខ្លួនស្ថិតក្នុងសង្កាត់ al-Mawasi នៅភាគខាងត្បូងហ្កាហ្សា ដោយបានសម្លាប់ក្មេង ២នាក់ និងមនុស្ស ៨នាក់ផ្សេងទៀត រងរបួស ។

សង្កាត់ al-Mawasi គឺជាតំបន់មនុស្សធម៌សុវត្ថិភាពដែលកងទ័ពអ៊ីស្រាអែល បានបញ្ជាឲ្យគ្រួសារប៉ាឡេស្ទីនជម្លៀសខ្លួនទៅកាន់ទីនោះ ប៉ុន្តែតំបន់មួយនេះ តែងតែក្លាយជាគោលដៅវាយប្រហារម្តងហើយម្តងទៀត ក្នុងរយៈពេលជាច្រើនសប្តាហ៍កន្លងមកនេះ ៕