ក្រុមជីហាដអ៊ិស្លាមប៉ាឡេស្ទីនដែលជាសម្ព័ន្ធមិត្តរបស់ក្រុមហាម៉ាស បានគាំទ្រការឆ្លើយតបរបស់ក្រុមមួយនេះ ចំពោះផែនការរបស់ប្រធានាធិបតីសហរដ្ឋអាមេរិកលោក Donald Trump ដើម្បីបញ្ចប់សង្រ្គាមនៅតំបន់ហ្កាហ្សាស្រ្ទីប ដោយពួកគេនិយាយថា វាតំណាងឲ្យជំហរនៃការតស៊ូរបស់ប៉ាឡេស្ទីន ។

 ការឯកភាពលើផែនការរបស់ក្រុមជីហាដអ៊ិស្លាម នឹងសម្របសម្រួលដល់ការដោះលែងចំណាប់ថ្នូរដែលជាប់ខ្លួននៅតំបន់ហ្កាហ្សា ។

ខណៈពេលនោះដែរ ការិយាល័យរបស់នាយករដ្ឋមន្ត្រីអ៊ីស្រាអែលលោក Benjamin Netanyahu បាននិយាយថា អ៊ីស្រាអែលកំពុងរៀបចំសម្រាប់ការអនុវត្តភ្លាមៗនៃដំណាក់កាលដំបូងនៃផែនការហ្កាហ្សារបស់លោក Trump សម្រាប់ការដោះលែងចំណាប់ថ្នូរអ៊ីស្រាអែល បន្ទាប់ពីការឆ្លើយតបរបស់ក្រុមហាម៉ាស ។ 

គួររំឭកថា អ៊ីស្រាអែលបានចាប់ផ្តើមការវាយប្រហាររបស់ពួកគេ ក្រោយការវាយប្រហាររបស់ក្រុមហាម៉ាសកាលពីថ្ងៃទី ៧ ខែតុលា ឆ្នាំ ២០២៣ លើតំបន់ភាគខាងត្បូងអ៊ីស្រាអែល ដោយបានសម្លាប់មនុស្ស ១.២០០នាក់ និងមនុស្ស ២៥១នាក់ផ្សេងទៀត ត្រូវបានចាប់ធ្វើជាចំណាប់ថ្នូរទៅកាន់តំបន់ហ្កាហ្សា ។

ដោយឡែក ការវាយប្រហាររបស់អ៊ីស្រាអែលលើតំបន់ហ្កាហ្សា បានសម្លាប់មនុស្សជាង ៦៦.០០០នាក់ និងបានបំផ្លិចបំផ្លាញដែនដីបិទច្រកប៉ាឡេស្ទីនមួយនេះស្ទើតែទាំងស្រុង ៕