​រុស្ស៊ី៖ ប្រធានាធិបតី​រុស្ស៊ី​លោក Vladimir Putin បាន​រិះគន់​វត្តមាន​របស់​អង្គការ​ NATO នៅ​អឺរ៉ុបខាងកើតកាលពី​ថ្ងៃ​អង្គារ​ដោយ​និយាយថា ពួកគេ​បាន​លេង​ដាក់​យើង​ហើយ​។ ថ្លែង​ក្នុងពេល​មានភាព​តានតឹងដែល​កំពុង​បន្ត​លើ​ការបង្កើន​កងទ័ព​រុស្ស៊ី​នៅ​ជិត​ព្រំដែន​ប្រទេស​អ៊ុយ​ក្រែ​ន លោក Putin បាននិយាយថា ប្រទេស​រុស្ស៊ី​ត្រូវបាន​សន្យាដោយ​អង្គការ NATO ថា NATO នឹងមិន​ឈានទៅ​មុខសម្រាប់ហេដ្ឋារចនាសម្ព័ន្ធ​រប​ស់​ប្រទេស​រុស្សី សូម្បី​តែមួយ​អ៊ី​ញ​ទៅ​ភាគ​ខាងកើត​។

ពេលនេះយើង​មើលឃើញ​កន្លែង​ដែល​ NATO ស្ថិតនៅមាននៅ​ប្រទេស​ប៉ូឡូញ រូ​ម៉ា​នី និង​រដ្ឋបាល់​ទិ​ក​។ លោក Putin បាន​និយាយ​ក្នុងអំឡុង​សន្និសីទ​ព័ត៌មានជាមួយ​នាយករដ្ឋមន្ត្រី​​ហុង​គ្រីលោក Victor Orban នៅ​ទីក្រុង​មូ​ស្គូដោយ​លោក​បាន​និយាយថា ពួកគេ​បាន​លេង​យើង​ហើយ​។ លោក Putin បាន​អះអាងថា វា​អាចទៅរួច​ក្នុង​ការចរចាបញ្ចប់​ការប្រឈមមុខ​ដាក់គ្នា ប្រសិនបើផលប្រយោជន៍​របស់​ភា​គី​ទាំងអស់ រួមទាំង​ការព្រួយបារម្ភ​ផ្នែក​សន្តិសុខ​របស់​ប្រទេស​រុស្ស៊ី ត្រូវបានយកមក​ពិចារណា​។ លោក​មានការ​សោកស្តាយ​ការបដិសេធ​របស់​ប្រទេស​លោកខាងលិច ​ក្នុងការពិចារណា​លើ​ការទាមទារ​របស់​វិមាន​ក្រឹម​ឡាំងសម្រាប់​ការធានាបាន​ថា ​អង្គការ NATO នឹងមិន​ពង្រីក​ខ្លួន​ទៅកាន់​ប្រទេស​អ៊ុយ​ក្រែ​ន នឹងមិន​ដាក់ពង្រាយ​អាវុធ​នៅ​ជិត​ព្រំដែន​ប្រទេស​រុស្ស៊ី ហើយនឹង​ដក​ត្រលប់​មកវិញនូវ​កងកម្លាំង​របស់​ខ្លួន​ពី​អឺរ៉ុប​ខាងកើត​។

មេដឹកនាំ​ប្រទេស​រុស្ស៊ីបាន​ចោទប្រកាន់​ថា ការបដិសេធ​របស់​សម្ព័ន្ធ​មិត្ត​ប្រទេស​លោកខាងលិច​ ក្នុង​ការមិន​យកចិត្តទុកដាក់​លើការទាមទារ​របស់​ប្រទេស​រុស្ស៊ី​ បាន​រំលោភ​លើ​កាតព្វកិច្ច​របស់​ពួកគេ​លើ​សុចរិត​ភាព​នៃសន្តិសុខសម្រាប់​ប្រទេស​ទាំងអស់ ហើយ​បាន​ទទូចថា​ដំណោះស្រាយ​អាច​ត្រូវបាន​រកឃើញ​តាមរយៈ​ការ​ពិភាក្សា​បន្ថែម​ទៀត​៕

អត្ថបទ៖ ប៊ុនថន