ប្រធានាធិបតីអ៊ុយក្រែនលោក Volodymyr Zelenskiy និយាយថា រុស្ស៊ីបានបើកការវាយប្រហារមួយផ្សេងទៀតលើហេដ្ឋារចនាសម្ព័ន្ធឧស្ម័ន ជាហេតុធ្វើឲ្យអាក់ខានដល់វិស័យថាមពលប្រទេសរបស់លោក ពេលដែលរដូវរងាជិតឈាងចូលមកដល់ ។

នៅក្នុងសុន្ទរកថាជាវីដេអូនៅពេលយប់លោក Zelenskiy និយាយថា មីស៊ីល ៣៥គ្រាប់ ត្រូវបានប្រើប្រាស់សម្រាប់ការវាយប្រហារលើកនេះ រួមទាំងមីស៊ីលបាលីស្ទិកមួយចំនួនផងដែរ ហើយពាក់កណ្តាលនៃមីស៊ីលទាំងនេះ ត្រូវបានបាញ់ទម្លាក់ ។

ក្រុមមន្រ្តីអ៊ុយក្រែននិយាយថា ការវាយប្រហារតាមច្រកអាកាសទ្រង់ទ្រាយធំរបស់រុស្ស៊ី បានវាយប្រហាររោងចក្រផលិតឧស្ម័នសំខាន់ៗជាច្រើនរបស់អ៊ុយក្រែន ហើយការវាយប្រហារខ្លះ បណ្តាលឲ្យមានការខូចខាតធ្ងន់ធ្ងរ ស្របពេលដែលអ៊ុយក្រែនត្រៀមខ្លួនសម្រាប់រដូវត្រូវការកម្តៅច្រើន ។

លោក Sergii Koretskyi គឺជាប្រធានប្រតិបត្តិក្រុមហ៊ុនឧស្ម័នអ៊ុយក្រែន Naftogaz និយាយថា រុស្ស៊ីបានបើកការវាយប្រហារមីស៊ីល ៣៥គ្រាប់ និងយានដ្រូន ៦០គ្រឿងលើទីតាំងជាច្រើនកន្លែងរបស់ក្រុមហ៊ុនលោកនៅតំបន់ Kharkiv និងតំបន់ Poltava កាលពីយប់កន្លងទៅ ដែលវាជាការវាយប្រហារទ្រង់ទ្រាយធំបំផុតលើផលិតកម្មឧស្ម័ន អំឡុងសង្រ្គាមមួយនេះ ។

រុស្ស៊ីបានបង្កើនការវាយប្រហាររបស់ពួកគេលើវិស័យថាមពលអ៊ុយក្រែន បង្កឲ្យមានការដាច់ចរន្តអគ្គិសនីនៅតាមតំបន់ជាច្រើន ៕