ទីភ្នាក់ងារកាត់បន្ថយគ្រោះមហន្តរាយ បាននិយាយនៅថ្ងៃអាទិត្យ (៥ តុលា) នេះថា ចំនួនសិស្សដែលត្រូវបញ្ជាក់ថាបានស្លាប់ បន្ទាប់ពីការបាក់រលំនៃអគារសាលារៀនអ៊ិស្លាមមួយកន្លែងនៅប្រទេសឥណ្ឌូនេស៊ី បានកើនឡើងដល់ទៅ ៣៦នាក់ហើយ ពីតួលេខជាង ១០នាក់ កាលពីមួយថ្ងៃមុននោះ។

ទីភ្នាក់ងារនេះបាននិយាយថា កិច្ចខិតខំប្រឹងប្រែងជួយសង្រ្គោះបានបន្តទៅមុខទៀតសម្រាប់ថ្ងៃទី៧ ដើម្បីស្វែងរកសាកសពសិស្ស ២៧នាក់ ដែលនៅតែប្រកាសថាបាត់ខ្លួន ដោយអ្នកទាំងនោះភាគច្រើនជាក្មេងប្រុសវ័យជំទង់អាយុចន្លោះពី ១៣ ទៅ ១៩ឆ្នាំ ជាប់នៅក្រោមគំនរបាក់បែក។

រថយន្តស្ទួចជាច្រើនគ្រឿងត្រូវបានបញ្ជូនទៅទីតាំងកើតហេតុដើម្បីជីកកកាយយកកម្ទេចកម្ទី ហើយកិច្ចខិតខំប្រឹងប្រែងស្វែងរក និងជម្លៀសបានរួចរាល់ ៦០% ហើយ នេះបើយោងតាមទីភ្នាក់ងារមួយនេះ ដែលបានបន្ថែមថា ខ្លួនរំពឹងថានឹងសម្អាតកម្ទេចកម្ទីទាំងអស់ និងបញ្ចប់ការស្វែងរកនៅថ្ងៃចន្ទស្អែកនេះ។

គួររម្លឹកថា សាលារៀនអ៊ិស្លាមឈ្មោះ Al Khoziny នៅទីក្រុង Sidoarjo ក្នុងខេត្ត ជ្វាខាងកើត របស់ប្រទេសឥណ្ឌូនេស៊ី បានរលំកាលពីថ្ងៃចន្ទកន្លងទៅ ដោយបានបាក់សង្កត់ពីលើសិស្សសាលាជំទង់រាប់រយនាក់ អំឡុងពិធីអធិស្ឋានពេលរសៀល ដោយសារគ្រឹះរបស់អគារមិនអាចទ្រទ្រង់ការងារសំណង់ ដែលកំពុងបន្តនៅជាន់ខាងលើរបស់សាលានេះបាន៕