ហ្វូងមនុស្សរាប់ម៉ឺននាក់នៅក្នុងបណ្តាប្រទេសអ៊ឺរ៉ុបជាច្រើន បានសម្រុកធ្វើបាតុកម្មគាំទ្រជនជាតិប៉ាឡេស្ទីនកាលពីថ្ងៃសៅរ៍ (៤ តុលា) កន្លងទៅ ដោយថ្កោលទោសការរាំងខ្ទប់ផ្លូវជំនួយរបស់អ៊ីស្រាអែល នៅតំបន់ហ្កាហ្សាស្រ្ទីប ខណៈពេលដែលបង្ហាញពីសាមគ្គីភាពជាមួយប្រជាជនប៉ាឡេស្ទីន។

នៅចក្រភពអង់គ្លេស ក្រុមអ្នកតវ៉ាបានប្រមូលផ្តុំគ្នានៅទីលានចតុរង្គ Trafalgar នៅកណ្តាលទីក្រុងឡុងដ្រ៍ ដោយកាន់បដា ស្លាក និងទង់ជាតិប៉ាឡេស្ទីន ដោយប្រកាសគាំទ្រជនជាតិប៉ាឡេស្ទីន។ បាតុកម្មទ្រង់ទ្រាយធំក៏បានផ្ទុះឡើងនៅអ៊ីតាលី និងបារាំង ផងដែរកាលពីថ្ងៃសៅរ៍។ ក្រុមបាតុករបានដើរតាមដងផ្លូវដើម្បីបង្ហាញពីសាមគ្គីភាពជាមួយជនប៉ាឡេស្ទីន ដោយទាមទារឱ្យរដ្ឋាភិបាលរបស់ពួកគេបញ្ឈប់កិច្ចសហប្រតិបត្តិការជាមួយអ៊ីស្រាអែល។

នៅអ៊ីតាលី ការប៉ះទង្គិចមួយចំនួនបានផ្ទុះឡើង នៅពេលមនុស្សប្រហែល ២៥ម៉ឺននាក់បានដើរដង្ហែរឆ្លងកាត់កណ្តាលទីក្រុងរ៉ូម កាលពីថ្ងៃសៅរ៍ សម្រាប់ការតវ៉ា ៤ថ្ងៃជាប់ៗគ្នាហើយនៅក្នុងប្រទេសនេះ តាំងពីអ៊ីស្រាអែល បានស្កាត់នាវាជំនួយអន្តរជាតិ ដែលព្យាយាមផ្តល់ជំនួយដល់តំបន់ហ្កាហ្សា ហើយបានឃុំខ្លួនសកម្មជនលើទូកទាំងនោះ។

ចាប់តាំងពីអ៊ីស្រាអែល បានចាប់ផ្តើមរារាំងកងនាវាជំនួយអន្តរជាតិនោះកាលពីល្ងាចថ្ងៃពុធមក ការតវ៉ាបានផ្ទុះឡើងនៅទូទាំងទ្វីបអឺរ៉ុប និងផ្នែកផ្សេងទៀតនៃពិភពលោក ប៉ុន្តែនៅក្នុងប្រទេសអ៊ីតាលី បាតុកម្មបានកើតឡើងជារៀងរាល់ថ្ងៃចាប់តាំងពីថ្ងៃពុធកន្លងទៅនោះ និងនៅតាមទីក្រុងជាច្រើន៕