ព្រះសីហនុ៖ គិតពីថ្ងៃសែនចិនទី៣១ ខែមករា រហូតត្រឹមថ្ងៃទី២ កុម្ភៈ ឆ្នាំ២០២២នេះ ខេត្តព្រះសីហនុ ទទួលបានភ្ញៀវទេសចរណ៍ចំនួនប្រមាណ៤ម៉ឺននាក់ ។

លោក តាំង សុចិត្រគ្រឹស្នា ប្រធានមន្ទីរទេសចរណ៍ខេត្តព្រះសីហនុ នៅព្រឹកថ្ងៃទី២ ខែកុម្ភៈនេះ បានមានប្រសាសន៍ប្រាប់ទូរទស្សន៍ព័ត៌មានប៊ីធីវី ថា ក្នុងឱកាសបុណ្យចូលឆ្នាំចិននេះ រដ្ឋបាលខេត្ត ក៏ដូចជាមន្ទីរទេសចរណ៍ខេត្ត បានធ្វើការណែនាំ​ដល់ម្ចាស់អាជីវកម្មនានានិងគ្រប់វិស័យ​ឲ្យ​ចូលរួម​ពង្រឹងការអនុវត្តវិធានការសុខាភិបាល​ ជាពិសេសវិធានការ ​៣ការពារ និង៣កុំ ដើម្បីទប់ស្កាត់​ការ​ឆ្លងរាលដាលនៃជំងឺកូវីដ១៩ ​ជាពិសេសនៅពេលធ្វើដំណើរដោយមធ្យោបាយរួមព្រមទាំងការជួបជុំ ការប្រមូលផ្ដុំមនុស្ស នៅតាមកន្លែងចេញដំណើរ ឬនៅតាមរមណីយដ្ឋាននានាផងដែរ។

ដោយឡែកពាក់ព័ន្ធកន្លែង និងតម្លៃស្នាក់វិញ លោកបានបញ្ជាក់ថា មិនមានបញ្ហាទេទាក់ទង​នឹង​ការ​ដំឡើងថ្លៃ ​ដោយសារមន្ទីរខេត្តបានចុះផ្សព្វផ្សាយ ​និងណែនាំឱ្យអ្នកប្រកបរបរក្នុងវិស័យទាំងអស់ សុំកុំឱ្យដំឡើងថ្លៃ ​ទោះបីជាការងើបឡើងវិញ​នៃចំនួនទេសចរណ៍មានភាពល្អប្រសើរក៏ដោយ។

ជាមួយគ្នានេះ លោកបានអំពាវនាវដល់ប្រជាពលរដ្ឋទាំងអស់ ឱ្យបង្កើនការប្រុងប្រយ័ត្ននៅក្នុង​អំឡុង​ពេល​ឈប់សម្រាក​នៃពិធីបុណ្យចូលឆ្នាំចិននេះ​ និងឱ្យប្រកាន់ខ្ជាប់នូវវិធានការសុវត្ថិភាពផ្នែក​សុខាភិបាល​ក្នុងការ​ទប់ស្កាត់ការឆ្លងជំងឺកូវីដ ១៩។

សូមបញ្ជាក់ថា ​ចលនាទេសចរណ៍ផ្ទៃក្នុង ​កំពុងក្លាយជាចលករសំខាន់ក្នុង​ការជំរុញវិស័យ​ទេស​ចរណ៍ ​ក្នុងវិបត្តិកូវីដ១៩។​ ការចាក់វ៉ាក់សាំងកូវិដ១៩ពេញលេញ ​និងចូលដល់ជំរុញផង ធ្វើឱ្យ​ប្រជាពលរដ្ឋមានទំនុក​ចិត្តក្នុងការប្រកបអាជីវកម្ម​ និងដើរកម្សាន្តតាមទិសដៅទេសចរណ៍​នានា​ក្នុងក្របខណ្ឌទូទាំងប្រទេស៕អត្ថបទ៖ ឈិត បូរ៉ាវី