នគរបាលទីក្រុងឡុងដ្រ៍ នៃចក្រភពអង់គ្លេស បានចាប់ខ្លួនបាតុកររាប់រយនាក់ ដោយសារតែអ្នកទាំងនោះចេញតវ៉ាគាំទ្រក្រុមសកម្មភាពប៉ាឡេស្ទីន (Palestine Action) ដែលត្រូវបានហាមឃាត់ នៅក្នុងបាតុកម្មដ៏ធំមួយកាលពីថ្ងៃសៅរ៍ (៤ តុលា) ដែលនៅតែកើតឡើងបើទោះបីជាមានការស្នើឱ្យលុបចោលក៏ដោយ បន្ទាប់ពីការវាយប្រហារនៅឯវិហារសាសនាជ្វីហ្វ ក្នុងទីក្រុង Manchester។

យោងតាមនគរបាលក្រុងឡុងដ្រ៍ មានមនុស្សយ៉ាងតិច ៤៤០នាក់ ត្រូវបានចាប់ខ្លួនក្នុងអំឡុងការតវ៉ាកាលពីថ្ងៃសៅរ៍នោះ។ ក្រុមរៀបចំបាតុកម្ម បានបដិសេធសំណើរបស់នគរបាល និងរដ្ឋាភិបាលក្នុងការលុបចោលបាតុកម្មកាលពីថ្ងៃសៅរ៍ ក្នុងគោលបំណងប្រឆាំងនឹងបម្រាមលើក្រុមសកម្មភាពប៉ាឡេស្ទីន។

ហ្វូងមនុស្សជាង ១.០០០នាក់ បានសាទរ និងអបអរលើកទឹកចិត្តអ្នកដែលត្រូវបានចាប់ខ្លួននៅទីលានចតុរង្គ Trafalgar កណ្តាលទីក្រុងឡុងដ្រ៍ ខណៈនគរបាលបានរុញច្រានឆ្លងកាត់ហ្វូងមនុស្ស ស្របពេលបាតុករស្រែកថា "គួរឱ្យអាម៉ាស់ណាស់" ទៅកាន់មន្រ្តីសមត្ថកិច្ច។

បាតុកម្មថ្ងៃសៅរ៍នេះគឺជាការតវ៉ាចុងក្រោយបង្អស់នៃសកម្មភាពប្រមូលផ្ដុំគ្នាបែបនេះជាបន្តបន្ទាប់ដើម្បីគាំទ្រក្រុមសកម្មភាពប៉ាឡេស្ទីន ដែលនគរបាលហាមឃាត់ ហើយមនុស្សរាប់រយនាក់ត្រូវបានចាប់ខ្លួន៕