ក្រសួងការបរទេសអេហ្ស៊ីប បានប្រកាសកាលពីថ្ងៃសៅរ៍ថា អេហ្ស៊ីប នឹងធ្វើជាម្ចាស់ផ្ទះទទួលគណៈប្រតិភូមកពីអ៊ីស្រាអែល និងក្រុមហាម៉ាស នៅថ្ងៃចន្ទ (៦ តុលា) ស្អែកនេះ ដើម្បីពិភាក្សាពី "លក្ខខណ្ឌ និងព័ត៌មានលម្អិត" ក្នុងការដោះដូរដែលអាចកើតមាន នៃចំណាប់ថ្នូរអ៊ីស្រាអែលទាំងអស់ និងអ្នកទោសប៉ាឡេស្ទីន ជាផ្នែកមួយនៃសំណើបទឈប់បាញ់ចុងក្រោយបង្អស់ដែលគាំទ្រដោយសហរដ្ឋអាមេរិក សម្រាប់តំបន់ហ្កាហ្សា។

ក្រសួងអេហ្ស៊ីប បានបន្ថែមថា ទីក្រុងគែរសង្ឃឹមថា កិច្ចពិភាក្សានេះនឹងជួយ "បញ្ចប់សង្រ្គាម និងការរងទុក្ខវេទនារបស់បងប្អូនប៉ាឡេស្ទីន ដែលបានបន្តអស់ពីរឆ្នាំជាប់ៗគ្នាមកហើយ" ដោយកត់សម្គាល់ថា កិច្ចប្រជុំនេះគឺជាផ្នែកមួយនៃកិច្ចខិតខំប្រឹងប្រែងសម្រុះសម្រួលយ៉ាងទូលំទូលាយរបស់អេហ្ស៊ីប ជាមួយនឹងដៃគូអន្តរជាតិផ្សេងទៀត។

នាយករដ្ឋមន្ត្រីអ៊ីស្រាអែល លោក Benjamin Netanyahu ក៏បានសម្តែងសុទិដ្ឋិនិយមកាលពីថ្ងៃសៅរ៍ថា ចំណាប់ថ្នូរទាំងអស់នៅហ្កាហ្សា អាចនឹងត្រូវដោះលែងក្នុងប៉ុន្មានថ្ងៃខាងមុខ។ ចំណែកក្រុមហាម៉ាស ក៏បានប្រកាសកាលពីថ្ងៃសុក្រកន្លងទៅថា ខ្លួនព្រមទទួលយកសំណើ ២០ចំណុច នោះជាគោលការណ៍ ហើយបានត្រៀមខ្លួនរួចជាស្រេចសម្រាប់កិច្ចចរចាដែលមានការសម្របសម្រួល។

សហគមន៍អន្តរជាតិបានស្វាគមន៍ចំពោះចំណាត់ការនេះ ហើយបានជំរុញឱ្យភាគីទាំងពីរឆ្លៀតឱកាសនេះដើម្បីបញ្ចប់ការប្រយុទ្ធគ្នាយ៉ាងបង្ហូរឈាម និងបន្ធូរបន្ថយការឈឺចាប់របស់ជនស៊ីវិលប៉ាឡេស្ទីន ខណៈសង្រ្គាមបានបន្តយ៉ាងឃោរឃៅជិតពីរឆ្នាំមកនេះ៕