ប្រធានាធិបតីអាមេរិក លោក Donald Trump បាននិយាយកាលពីថ្ងៃអាទិត្យ (៥ តុលា) ថា កិច្ចពិភាក្សាជាមួយក្រុមហាម៉ាស ដើម្បីបញ្ចប់សង្រ្គាមរបស់អ៊ីស្រាអែល នៅតំបន់ហ្កាហ្សា និងការដោះលែងចំណាប់ថ្នូរក្នុងដៃក្រុមសកម្មប្រយុទ្ធប៉ាឡេស្ទីនមួយនេះ កំពុងរីកចម្រើនទៅមុខយ៉ាងឆាប់រហ័ស។

ក្នុងការបង្ហោះលើប្រព័ន្ធផ្សព្វផ្សាយសង្គម លោក Trump បាននិយាយថា៖ កិច្ចពិភាក្សាទាំងនេះទទួលបានជោគជ័យយ៉ាងខ្លាំង ហើយដំណើរការយ៉ាងឆាប់រហ័ស។ ក្រុមបច្ចេកទេសនឹងជួបគ្នាម្តងទៀតនៅថ្ងៃចន្ទនេះ ក្នុងប្រទេសអេហ្ស៊ីប ដើម្បីធ្វើការពិនិត្យខ្លឹមសារម្ដងទៀត និងបញ្ជាក់លម្អិតចុងក្រោយ។ ក្រុមការងារជូនដំណឹងមកថា ដំណាក់កាលទី១ គួរតែបញ្ចប់នៅក្នុងសប្តាហ៍នេះ។

គួរឱ្យដឹងថា ដំណាក់កាលដំបូងនឹងមើលឃើញការដោះលែងចំណាប់ថ្នូរ ដោះដូរនឹងអ្នកទោសប៉ាឡេស្ទីន ក្នុងពន្ធនាគារអ៊ីស្រាអែល។ លោក Trump បានផ្សព្វផ្សាយផែនការសន្តិភាព ២០ចំណុចរបស់លោក ដែលមានគោលបំណងបញ្ចប់ការប្រយុទ្ធនៅតំបន់ហ្កាហ្សា ធានាការដោះលែងចំណាប់ថ្នូរសេសសល់ និងកំណត់អនាគតរបស់ទឹកដីនេះ។ ទាំងអ៊ីស្រាអែល និងក្រុមហាម៉ាស បានយល់ព្រមលើផ្នែកខ្លះនៃផែនការនេះរួចទៅហើយ។

ផែនការនេះបានជំរុញឱ្យមានក្តីសង្ឃឹមសម្រាប់សន្តិភាពក្នុងចំណោមប្រជាជនប៉ាឡេស្ទីន ប៉ុន្តែការវាយប្រហាររបស់អ៊ីស្រាអែល លើតំបន់ហ្កាហ្សា នៅតែបន្តទៅមុខឥតឈប់ឈរកាលពីថ្ងៃអាទិត្យ។ មន្ត្រីម្នាក់ដែលដឹងពីកិច្ចចរចានៅអេហ្ស៊ីប បាននិយាយថា អ្នកចរចានឹងផ្តោតលើការសម្រេចកិច្ចព្រមព្រៀងដ៏ទូលំទូលាយមួយ មុនពេលបទឈប់បាញ់អាចត្រូវបានអនុវត្ត៕