ក្រសួងការបរទេសអ៊ីតាលី បាននិយាយថា ទីក្រុងរ៉ូម កំពុងធ្វើការយ៉ាងជិតស្និទ្ធជាមួយគណៈកម្មាការអឺរ៉ុប ដើម្បីជំរុញសហរដ្ឋអាមេរិក ឱ្យពិចារណាឡើងវិញនូវពន្ធបន្ថែមដ៏ខុ្ពស់ប្រឆាំងការលក់បង្ខូចថ្លៃ លើការនាំចូលមីផាស្តា (Pasta) ដែលនឹងធ្វើឱ្យតម្លៃរបស់អាហារប្រភេទនេះកើនឡើងទ្វេដង។

ការសម្រេចចិត្តដាក់ពន្ធបន្ថែម ៩១,៧៤% លើផាស្តា គឺជាលទ្ធផលនៃការដំណើរការស៊ើបអង្កេតរបស់ក្រសួងពាណិជ្ជកម្មសហរដ្ឋអាមេរិក ដែលបានរកឃើញថា ក្រុមហ៊ុនផលិតអ៊ីតាលីធំៗចំនួន ២ស្ថាប័ន ត្រូវចោទប្រកាន់ថាលក់ផលិតផលផាស្តាក្នុងតម្លៃទាបដ៏អយុត្តិធម៌ - ជាការអនុវត្តមួយដែលគេស្គាល់ថាការលក់បង្ខូចថ្លៃ - រវាងខែកក្កដា ឆ្នាំ២០២៣ និងខែមិថុនា ឆ្នាំ២០២៤។

អត្រាពន្ធថ្មីនេះនឹងបន្ថែមពីលើពន្ធ ១៥% មានស្រាប់របស់អាមេរិក លើការនាំចូលភាគច្រើនពីសហភាពអឺរ៉ុប ដែលមានសមាជិក ២៧ប្រទេស ហើយនឹងត្រូវអនុវត្តចាប់ពីខែមករា ឆ្នាំ២០២៦តទៅ។

ក្រសួងការបរទេសអ៊ីតាលី បាននិយាយក្នុងសេចក្តីថ្លែងការណ៍មួយកាលពីល្ងាចថ្ងៃសៅរ៍ (៤ តុលា) ថា ខ្លួនបានជំទាស់នឹងការរកឃើញ និងពន្ធថ្មីនោះ ហើយកំពុងជួយក្រុមហ៊ុននានាក្នុងការការពារសិទ្ធិរបស់ពួកគេតាមរយៈស្ថានទូតក្នុងទីក្រុងវ៉ាស៊ីនតោន។

អាមេរិក គឺជាទីផ្សារនាំចេញមួយក្នុងចំណោមទីផ្សារនាំចេញកំពូលទាំង៣ របស់អ៊ីតាលី សម្រាប់ផាស្តា ជាមួយនឹងការនាំចេញជិត ៨០០លានដុល្លារ ខណៈមីប្រភេទនេះជាដំណែលម្ហូបអាហារដ៏ល្បីល្បាញរបស់អ៊ីតាលី និងជាទំនិញនាំចេញយ៉ាងច្រើន។ យោងតាមទិន្នន័យដោយទីភ្នាក់ងារស្ថិតិជាតិ ISTAT បានឱ្យដឹងថា នៅឆ្នាំ២០២៤ ការនាំចេញផាស្តាសរុបរបស់អ៊ីតាលី មានតម្លៃជាង ៤ពាន់លានអឺរ៉ូ (៤,៧០ ពាន់លានដុល្លារ) ជាមួយនឹងជិតតួលេខ ២,៥លានតោន បានលក់ទៅក្រៅប្រទេស៕