គណបក្សកាន់អំណាចរបស់ប្រទេសជប៉ុន បានជ្រើសរើសលោកស្រី Sanae Takaichi វ័យ ៦៤ឆ្នាំ ដែលជាអ្នកអភិរក្សនិយមប្រកាន់ជំហរតឹង ឱ្យធ្វើជាប្រមុខដឹកនាំរបស់ខ្លួនកាលពីថ្ងៃសៅរ៍ចុងសប្ដាហ៍ ដោយដាក់ឱ្យលោកស្រីនៅលើផ្លូវឆ្ពោះទៅរកតំណែងនាយករដ្ឋមន្ត្រីស្ត្រីដំបូងគេរបស់ប្រទេសនេះ ក្នុងជំហានមួយដែលធ្វើឱ្យវិនិយោគិន និងប្រទេសជិតខាងរង់ចាំមើលយ៉ាងអន្ទះសារ។

ប្រភពពីគណបក្សបាននិយាយថា រដ្ឋបាលដឹកនាំដោយបក្សប្រជាធិបតេយ្យសេរីនិយម (LDP) កំពុងសម្របសម្រួលដើម្បីកោះប្រជុំសភាសម្រាប់សម័យប្រជុំវិសាមញ្ញមួយនៅថ្ងៃទី១៥ ខែតុលា ខាងមុខ ដើម្បីបោះឆ្នោតជ្រើសរើសនាយករដ្ឋមន្ត្រីបន្ទាប់របស់ជប៉ុន ក្រោយជ័យជម្នះរបស់លោកស្រី Takaichi។

ការបោះឆ្នោតជ្រើសរើសអ្នកស្នងតំណែងបន្តពីលោកនាយករដ្ឋមន្ត្រី Shigeru Ishiba ដែលកំពុងចាកចេញ ត្រូវបានរំពឹងទុកនៅថ្ងៃដំបូងនៃសម័យប្រជុំនោះ ហើយនាយករដ្ឋមន្ត្រីថ្មី នឹងបង្កើតគណៈរដ្ឋមន្ត្រីរបស់ខ្លួននៅល្ងាចថ្ងៃដដែល។ លោកស្រី Takaichi ទំនងជាទទួលបានតំណែង ព្រោះក្រុមចម្រុះកាន់អំណាចមានចំនួនអាសនៈច្រើនជាងគេក្នុងសភា។

ក្នុងសន្និសីទសារព័ត៌មានមួយបន្ទាប់ពីទទួលបានជ័យជម្នះជាប្រធានបក្សកាន់អំណាច LDP លោកស្រី Takaichi បានដាក់ចេញនូវផែនការជាច្រើនដើម្បីកាត់បន្ថយពន្ធអាករ និងបង្កើនការឧបត្ថម្ភធន ប៉ុន្តែបាននិយាយថា លោកស្រីយល់ពី "សារៈសំខាន់នៃការប្រុងប្រយ័ត្នសារពើពន្ធ"។

ប្រសិនបើជាប់ឆ្នោតជានាយករដ្ឋមន្ត្រីជាផ្លូវការ លោកស្រី Takaichi បាននិយាយថា លោកស្រីនឹងធ្វើដំណើរទៅក្រៅប្រទេសទៀងទាត់ជាងអ្នកកាន់តំណែងពីមុន ដើម្បីផ្សព្វផ្សាយឃ្លាថា "ជប៉ុនត្រឡប់មកវិញហើយ"៕