ប្រធានាធិបតីសហរដ្ឋអាមេរិក លោក Donald Trump បាននិយាយកាលពីថ្ងៃអាទិត្យថា សំណើរបស់ប្រធានាធិបតីរុស្ស៊ី លោក Vladimir Putin ក្នុងការរក្សាដោយស្ម័គ្រចិត្តនូវដែនកំណត់លើអាវុធនុយក្លេអ៊ែរយុទ្ធសាស្ត្រដែលត្រូវបានដាក់ពង្រាយ «ស្តាប់ទៅដូចជាគំនិតល្អ»។

លោក Putin កាលពីខែមុន បានស្នើឱ្យរក្សាទុកដោយស្ម័គ្រចិត្តលើទំហំឃ្លាំងអាវុធនុយក្លេអ៊ែរធំបំផុតរបស់ពិភពលោក ដូចដែលបានកំណត់ដោយសន្ធិសញ្ញា New START ឆ្នាំ២០១០ ប្រសិនបើទីក្រុងវ៉ាស៊ីនតោន ព្រមព្រៀងធ្វើដូចគ្នា។ កិច្ចសន្យានេះនឹងត្រូវផុតកំណត់នៅខែកុម្ភៈ។

លោក Trump បានប្រាប់អ្នកសារព័ត៌មានខណៈលោកចាកចេញពីសេតវិមានថា «ស្តាប់ទៅដូចជាគំនិតល្អសម្រាប់ខ្ញុំ» នៅពេលត្រូវបានសួរអំពីសំណើរបស់លោក Putin។ លោក Vassily Nebenzia ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិ បាននិយាយកាលពីសប្តាហ៍មុនថា ទីក្រុងមូស្គូនៅតែរង់ចាំការឆ្លើយតបជាផ្លូវការពីទីក្រុងវ៉ាស៊ីនតោនចំពោះសំណើររបស់លោកPutinដើម្បីរក្សាដែនកំណត់ដោយស្ម័គ្រចិត្តលើអាវុធយុទ្ធសាស្ត្រដែលបានដាក់ពង្រាយនៅពេលដែលសន្ធិសញ្ញានេះផុតកំណត់។

ការយោគយល់ថ្មីណាមួយ នឹងសម្គាល់ពីឱកាសដ៏កម្រនៃកិច្ចសហប្រតិបត្តិការក្នុងពេលមានភាពតានតឹងកាន់តែខ្លាំងឡើងរវាងប្រទេសទាំងពីរ ចាប់តាំងពីលោក Trump និងលោក Putin បានជួបគ្នានៅរដ្ឋអាឡាស្កា កាលពីពាក់កណ្តាលខែសីហា ខណៈមានសេចក្តីរាយការណ៍ថាយានដ្រូនរបស់រុស្ស៊ីបានងាកចូលទៅក្នុងដែនអាកាសរបស់សម្ព័ន្ធយោធាណាតូ។ នៅក្នុងវីដេអូដែលបានចេញផ្សាយកាលពីថ្ងៃអាទិត្យ លោក Putin បានព្រមានថាការសម្រេចចិត្តរបស់សហរដ្ឋអាមេរិកណាមួយក្នុងការផ្គត់ផ្គង់មីស៊ីល Tomahawk រយៈចម្ងាយឆ្ងាយដល់អ៊ុយក្រែនសម្រាប់ការវាយប្រហារចូលជ្រៅទៅក្នុងប្រទេសរុស្ស៊ីនឹង «បំផ្លាញ» ទំនាក់ទំនងរវាងទីក្រុងមូស្គូ និងទីក្រុងវ៉ាស៊ីនតោន។