រដ្ឋមន្ត្រីការបរទេសអ៊ីរ៉ង់ បានប្រកាសថា កិច្ចសហប្រតិបត្តិការជាមួយអង្គការឃ្លាំមើលនុយក្លេអ៊ែររបស់អង្គការសហប្រជាជាតិ គឺ «លែងពាក់ព័ន្ធទៀតហើយ» បន្ទាប់ពីបណ្តាប្រទេសលោកខាងលិច បានដាក់ទណ្ឌកម្មជាអន្តរជាតិឡើងវិញទៅលើប្រទេសនេះ។

រដ្ឋមន្ត្រីការបរទេស លោក Abbas Araghchi បាននិយាយកាលពីថ្ងៃអាទិត្យថា «កិច្ចព្រមព្រៀងនៅទីក្រុងគែរ លែងពាក់ព័ន្ធសម្រាប់កិច្ចសហប្រតិបត្តិការរបស់យើងជាមួយទីភ្នាក់ងារ IAEA ទៀតហើយ» ដោយនិយាយយោងទៅរកកិច្ចព្រមព្រៀងមួយដែលបានចុះហត្ថលេខាកាលពីខែមុនជាមួយទីភ្នាក់ងារថាមពលអាតូមិកអន្តរជាតិ(IAEA)។

កិច្ចព្រមព្រៀងនេះ បានដាក់ចេញនូវក្របខណ្ឌមួយសម្រាប់ការត្រួតពិនិត្យនិងតាមដានឡើងវិញ បន្ទាប់ពីទីក្រុងតេអេរ៉ង់ បានផ្អាកកិច្ចសហប្រតិបត្តិការ ក្រោយការវាយប្រហាររបស់អ៊ីស្រាអែល និងសហរដ្ឋអាមេរិកលើរោងចក្រនុយក្លេអ៊ែររបស់ខ្លួន កាលពីខែមិថុនា។

ទោះជាយ៉ាងណា កិច្ចព្រមព្រៀងនេះបានបាត់បង់សារៈសំខាន់បន្ទាប់ពីចក្រភពអង់គ្លេស បារាំង និងអាល្លឺម៉ង់ ដែលជាប្រទេសហត្ថលេខីនៃកិច្ចព្រមព្រៀងនុយក្លេអ៊ែរឆ្នាំ២០១៥ បានបង្កឱ្យមានការវិលត្រឡប់មកវិញនៃទណ្ឌកម្មរបស់អង្គការសហប្រជាជាតិ ដោយចោទប្រកាន់អ៊ីរ៉ង់ថាបានរំលោភលើការសន្យារបស់ខ្លួន ជាការអះអាងដែលទីក្រុងតេអេរ៉ង់ បានច្រានចោល។