អាជ្ញាធរនៅប្រទេសអូស្ត្រាលី បានចាប់ខ្លួនបុរសវ័យ ៦០ឆ្នាំម្នាក់ នៅថ្ងៃចន្ទ (៦ តុលា) នេះ បន្ទាប់ពីនគរបាលនិយាយថា បុរសរូបនោះបានបើកការបាញ់ប្រហាររហូតដល់ ៥០គ្រាប់ ទៅក្នុងផ្លូវដ៏មមាញឹកមួយកន្លែងនៅទីក្រុងស៊ីដនី ដោយបានធ្វើឱ្យមនុស្សជាច្រើននាក់រងរបួស។

នគរបាលត្រូវបានគេជូនដំណឹងកាលពីល្ងាចថ្ងៃអាទិត្យ ឱ្យចុះទៅកាន់តំបន់ Inner West នៃទីក្រុងស៊ីដនី ជាទីដែលជនសង្ស័យថាជាខ្មាន់កាំភ្លើងរូបនោះ បានបាញ់រះចេញពីលំនៅឋានរបស់ខ្លួនដោយមិនរើសមុខ ដាក់លើរថយន្តឆ្លងកាត់ និងនគរបាល។

កម្លាំងសមត្ថកិច្ចចម្រុះបានឡោមព័ទ្ធទីតាំងខាងលើ និងបិទផ្លូវ មុនពេលចូលទៅទីតាំងកើតហេតុ និងចាប់ខ្លួនបុរសនោះ ហើយរឹបអូសកាំភ្លើងពីកន្លែងកើតហេតុ។ មិនទាន់មានការចោទប្រកាន់ផ្លូវច្បាប់ណាមួយចំពោះខ្មាន់កាំភ្លើងសង្ស័យនៅឡើយទេ ហើយការស៊ើបអង្កេតរបស់នគរបាលកំពុងបន្ត។

នគរបាលបាននិយាយពីដំបូងថា គ្រាប់កាំភ្លើងដល់ទៅ ១០០គ្រាប់ ត្រូវបានបាញ់ ហើយមនុស្ស ២០នាក់រងរបួស ប៉ុន្តែនៅថ្ងៃចន្ទនេះ ប្រធានស្តីទីនៃនគរបាលរដ្ឋ New South Wales លោក Stephen Parry បានកែប្រែចំនួនសំណល់គ្រាប់នៃការបាញ់ប្រហារមកនៅប្រហែល ៥០គ្រាប់ ហើយបន្ទាបចំនួនអ្នករងរបួសមកត្រឹម ១៦នាក់វិញ។ ស្នងការនគរបាលរដ្ឋ New South Wales លោក Mal Lanyon នៅថ្ងៃចន្ទនេះ បានពណ៌នាការបាញ់ប្រហារដ៏កម្រនេះថា "ធ្ងន់ធ្ងរ និងគួរឱ្យភ័យខ្លាចជាខ្លាំង"៕