រដ្ឋមន្ត្រីការបរទេស និងពាណិជ្ជកម្មហុងគ្រី លោក Peter Szijjarto កាលពីថ្ងៃអាទិត្យ (៥ តុលា) បានរិះគន់យ៉ាងចាស់ដៃលើសហភាពអឺរ៉ុប (EU) ដែលបានស្នើឡើងនូវក្របខណ្ឌថវិការយៈពេល ៧ឆ្នាំសម្រាប់ឆ្នាំ២០២៨-២០៣៤ ដោយហៅកញ្ចប់នេះថាជា "ថវិកាអ៊ុយក្រែន" និងព្រមានថា ប្រាក់របស់អ្នកជាប់ពន្ធអឺរ៉ុប នឹងត្រូវចំណាយនៅអ៊ុយក្រែន ជំនួសឱ្យការពង្រឹងសេដ្ឋកិច្ចរបស់ទ្វីប។

ថ្លែងទៅកាន់ប្រព័ន្ធផ្សព្វផ្សាយរដ្ឋ លោក Szijjarto បាននិយាយថា មេដឹកនាំសហភាពអឺរ៉ុប គ្រោងនឹងបែងចែកប្រាក់របស់ពលរដ្ឋខ្លួន ដើម្បីបំពាក់អាវុធ និងបំពាក់យុទ្ធោបករណ៍ដល់កងទ័ពអ៊ុយក្រែន និងទ្រទ្រង់រដ្ឋអ៊ុយក្រែន។ លោកបាននិយាយថា "រដ្ឋាភិបាលហុងគ្រី នឹងមិនអនុញ្ញាតឱ្យពលរដ្ឋហុងគ្រី បង់ថ្លៃកាន់តែខ្ពស់សម្រាប់សង្គ្រាមនៅអ៊ុយក្រែនទេ"។

លោក Szijjarto បានពណ៌នាពីអ្វីដែលលោកហៅថា "វិកលចរិតនៃសង្រ្គាមដ៏ឃោរឃៅ" ក្នុងចំណោមមេដឹកនាំនយោបាយអ៊ឺរ៉ុប ដោយរិះគន់ការរីកលូតលាស់នៃផ្នត់គំនិតតម្រង់ទៅរកសង្រ្គាមរយៈពេលវែងនៅទីក្រុងប្រ៊ុចសែល និងទូទាំងអឺរ៉ុបខាងលិច។ លោកបាននិយាយថា សេដ្ឋកិច្ចអឺរ៉ុប ប្រឈមមុខនឹងបញ្ហាធ្ងន់ធ្ងររួចទៅហើយ ហើយបានប្រកែកថា មូលនិធិរបស់ប្លុកអឺរ៉ុបគួរត្រូវបានប្រើដើម្បីស្ដារភាពប្រកួតប្រជែង ជាជាងផ្តល់ហិរញ្ញប្បទានដល់អ៊ុយក្រែន។

គណៈកម្មការអឺរ៉ុប កាលពីកក្កដា បានស្នើថវិកាចំនួន ២សែនកោដិអឺរ៉ូ (២,៣៣ សែនកោដិដុល្លារអាមេរិក) សម្រាប់ឆ្នាំ២០២៨-២០៣៤ នៅក្នុងកិច្ចចរចានៃសភាអឺរ៉ុប និងក្រុមប្រឹក្សាសហភាពអឺរ៉ុប មុនពេលអនុម័តចុងក្រោយ។ ក្របខណ្ឌថវិកា ដែលគ្រោងនឹងចូលជាធរមាននៅខែមករា ឆ្នាំ២០២៨ បែងចែកប្រាក់ចំនួន ១៣១ពាន់លានអឺរ៉ូ សម្រាប់វិស័យការពារជាតិ និងលំហអាកាស - ច្រើនជាង ៥ដងនៃផែនការបច្ចុប្បន្ន៕