ភ្នំពេញ៖ ក្រសួងធនធានទឹក និងឧតុនិយម កំពុងអភិវឌ្ឍប្រឡាយព្រែកពោធិ៍ ដែលជាប្រព័ន្ធធារាសាស្ត្របែប ទំនើបកម្ម នៅក្នុងភូមិសាស្ត្រស្រុកស្រីសន្ធរ ខេត្តកំពង់ចាម ដែលនឹងអាចឱ្យកសិករក្នុងឃុំចំនួន៧ទាញ ទឹកពីប្រឡាយនេះ យកទៅស្រោចស្រពដំណាំស្រូវ ទាំងដូវប្រាំង និងរដូវវស្សាលើផ្ទៃស្រែសរុបប្រមាណជិត ១ម៉ឺនហិកតា ។

ក្នុងសន្និសីទសារព័ត៌មានស្តីពីវឌ្ឍនភាពមូលដ្ឋានឃុំសង្កាត់ និងលើកទិសដៅបន្ត របស់ខេត្តកំពង់ ចាមកាលពីម្សិលមិញ នៅទីស្ដីការគណៈរដ្ឋមន្ត្រី លោក អ៊ុម វិបុល ប្រធានមន្ទីរធនធាទឹក និង​ឧតុនិយម ខេត្តកំពង់ចាម បានឱ្យដឹងថា នៅស្រុកស្រីសន្ធរ កាលមានស្ថានីយបូមទឹក​របស់​សម្ដេចតេជោទី៣០ ៣១ ៣២ និង៣៣ បូមទឹកពីទន្លេមេគង្គ ប្រើប្រាស់ម៉ាស៊ីនបណ្ដែត បូមទម្លាក់​ទៅប្រឡាយមេ និងបូមបន្តទៀត ​ដើម្បីនាំទឹកជូនប្រជាពលរដ្ឋខ្វះខាតទឹកស្រោចស្រោពដំណាំ​កសិកម្មនៅចុងរដូវឬនៅដើមរដូវ។

លោក បានបន្តថា ដើម្បីបង្កភាពងាយស្រួលក្នុងការនាំទឹកយកទៅផ្គត់ផ្គង់ដំណាំស្រូវរបស់ពលរដ្ឋ ទៀតនោះ ក្រសួងធនធានទឹក ​បានអភិវឌ្ឍប្រព័ន្ធធារាស្ត្រព្រែកពោធិ៍ ដែលជាស្ថានីយបូមទឹក​ដោយ​ស្វ័យប្រវត្តិ ​អាចជួយស្រោចស្រពដំណាំស្រូវនៅរដូវវស្សាបានជាង​ ៨៥០០ហិកតា និងនៅរដូវប្រាំង​បាន​ជាង​ ៨៥០០ហិកតាដូចគ្នា។

លោក អ៊ុម វិបុល បាន​បន្ថែមថា ​សម្រាប់នៅខេត្តកំពង់ចាម ​នាពេល​បច្ចុប្បន្ន ​មាន​ប្រព័ន្ធធារា សាស្រ្ត​ចំនួនជាង ២៦០កន្លែង​ ក្នុងនោះ​មាន​ខ្នាតធំ ​១កន្លែង​ ខ្នាត​មធ្យម ​ចំនួន៧៤កន្លែង ​និងខ្នាតតូច ចំនួនជាង ១៨០កន្លែង ។

ក្នុងសន្និសីទនោះ ឯកឧត្តម ខ្លូត ផន ប្រធានក្រុមប្រឹក្សាខេត្តកំពង់ចាម ​បានថ្លែងអំណរគុណរាជ រដ្ឋាភិបាល​ និង​ក្រសួងធនធានទឹក​ ដែល​បានជួយ​អភិវឌ្ឍនូវប្រព័ន្ធធារាសាស្ត្រ ​ទាំងតូច ​ទាំងធំ​ដល់​ខេត្តកំពង់ចាម ​ដើម្បី​ជា​ប្រយោជន៍​សម្រាប់​ប្រជាពលរដ្ឋ៕អត្ថបទ៖ បាន សុខរិទ្ធ