អង្គការ OPEC+ កាលពីថ្ងៃអាទិត្យ (ទី៥ ខែតុលា) បានឲ្យដឹងថា ក្រុមនេះនឹងបង្កើនទិន្នផលប្រេង ចាប់ពីខែវិច្ឆិកា ចំនួន ១៣៧.០០០បារ៉ែល ក្នុងមួយថ្ងៃ (BPD) ដោយសម្រេចបង្កើនកម្រិតប្រចាំខែបន្តិចដូចគ្នា ក្នុងខែតុលា ស្របពេលក្ដីបារម្ភ អំពីការផ្គត់ផ្គង់លើសតម្រូវការ នៅតែមានឥតដាច់។

ក្រុមដែលរួមមានអង្គការនៃប្រទេសនាំចេញប្រេង បូកនឹងរុស្ស៊ី និងប្រទេសផលិតតូចៗមួយចំនួន បានបង្កើនគោលដៅទិន្នផលប្រេងរបស់ខ្លួនជាង ២,៧លានបារ៉ែល ក្នុងមួយថ្ងៃ នៅឆ្នាំនេះ ឬប្រហែល ២,៥ភាគរយនៃតម្រូវការពិភពលោក។ ការផ្លាស់ប្តូរគោលនយោបាយនេះ ដែលលេចឡើងបន្ទាប់ពីមានការកាត់បន្ថយជាច្រើនឆ្នាំ ត្រូវបានធ្វើឡើង ដើម្បីដណ្ដើមចំណែកទីផ្សារពីគូប្រជែងវិញ ដូចជាក្រុមហ៊ុនផលិតប្រេងពីថ្មរបស់សហរដ្ឋអាមេរិកជាដើម។

តម្លៃប្រេងបានឡើងខ្ពស់ កាលពីថ្ងៃសុក្រចុងសប្ដាហ៍កន្លងមក ប៉ុន្តែបានប្រចាំសប្តាហ៍ បានធ្លាក់ចុះ ៨,១ភាគរយ បន្ទាប់ពីមានព័ត៌មានអំពីបង្កើនទិន្នផលនាពេលខាងមុខ ចំពោះការផ្គត់ផ្គង់របស់ OPEC+។ តម្លៃប្រេងឆៅម៉ាក Brent បានឡើង ៤២សេន ឬ ០,៧ភាគរយ ដោយមានតម្លៃ ៦៤,៥៣ដុល្លារ ក្នុងមួយបារ៉ែល ខណៈដែល West Texas Intermediate (WTI) របស់សហរដ្ឋអាមេរិក បានឡើង ៤០សេន ឬ ០,៧ភាករយ ដោយមានតម្លៃ ៦០,៨៨ដុល្លារ។ ប្រចាំសប្តាហ៍ ប្រេងឆៅ Brent បានធ្លាក់ចុះ ៨,១ភាគរយ ដែលជាការខាតបង់ប្រចាំសប្តាហ៍ធំបំផុត ក្នុងរយៈពេលជាង ៣ខែ។ ចំណែក WTI ធ្លាក់ចុះ ៧,៤ភាគរយ ប្រចាំសប្តាហ៍។

ប្រភពខ្លះបានឲ្យដឹងថា មុនរយៈពេលទៅដល់កិច្ចប្រជុំនេះ រុស្ស៊ី និងអារ៉ាប៊ីសាអ៊ូឌីតដែលជាប្រទេសផលិតធំបំផុតជាងគេ នៅក្នុងក្រុម OPEC+ មានទស្សនៈផ្ទុយគ្នា។ ប្រភពចំនួន ២ បានប្រាប់នៅសប្តាហ៍នេះថា រុស្ស៊ីកំពុងគាំទ្រឲ្យបង្កើនទិន្នផលតិចតួច ដូចកាលពីខែតុលា ដើម្បីជៀសវាងការមានសម្ពាធលើតម្លៃប្រេង និងដោយសារតែខ្លួនពិបាក ក្នុងការបង្កើនទិន្នផល ដោយសារការដាក់ទណ្ឌកម្ម ពាក់ព័ន្ធនឹងសង្រ្គាម នៅក្នុងប្រទេសអ៊ុយក្រែន។

ប្រភពបានបង្ហើបឲ្យដឹងថា អារ៉ាប៊ីសាអ៊ូឌីត នឹងចង់បង្កើនកម្រិតទ្វេដង បីដង ឬសូម្បីតែបួនដងនៃតួលេខនោះ ពោលគឺ ២៧៤.០០០បារ៉ែល ក្នុងមួយថ្ងៃ ៤១១.០០០បារ៉ែល ក្នុងមួយថ្ងៃ ឬ ៥៤៨.០០០បារ៉ែល ក្នុងមួយថ្ងៃ រៀងគ្នា ដោយសារតែខ្លួនមានសមត្ថភាពផលិតបន្ថែម ហើយចង់ដណ្ដើមបានចំណែកទីផ្សារវិញឲ្យបានលឿនជាងនេះ។ តាមរយៈចក្តីថ្លែងការណ៍មួយកាលពីថ្ងៃអាទិត្យ អង្គការ OPEC ចាត់ទុកសេដ្ឋកិច្ចពិភពលោកមានស្ថិរភាព ហើយថា មូលដ្ឋានគ្រឹះទីផ្សារមានភាពល្អប្រសើរ ដោយសារការស្តុកប្រេងទាប៕