ក្រុមប្រឹក្សាសិទ្ធិមនុស្សអង្គការសហប្រជាជាតិ (UN) នឹងសម្រេចនៅថ្ងៃចន្ទ (ទី៦ ខែតុលា) នេះ ថា តើត្រូវចាប់ផ្ដើមការស៊ើបអង្កេត ដើម្បីប្រមូលភស្តុតាង ស្តីពីការរំលោភច្បាប់អន្តរជាតិធ្ងន់ធ្ងរបំផុត នៅក្នុងប្រទេសអាហ្វហ្គានីស្ថានដែរ ឬយ៉ាងណា។

សេចក្តីព្រាងសេចក្តីសម្រេច ដែលដាក់ចេញដោយប្រទេសដាណឺម៉ាក តំណាងឲ្យសហភាពអឺរ៉ុប (EU) នឹងត្រូវពិភាក្សា នៅក្រុមប្រឹក្សាដែលមានមូលដ្ឋាននៅទីក្រុងហ្សឺណែវ ប្រទេសស្វីស។

អាណត្តិអ្នករាយការណ៍ពិសេសរបស់ UN ទទួលបន្ទុកអាហ្វហ្គានីស្ថាន ជាគណៈកម្មការជំនាញឯករាជ្យមួយ ដែលត្រូវបានចាត់តាំងឲ្យរាយការណ៍ពីការរកឃើញរបស់ពួកគេទៅកាន់ក្រុមប្រឹក្សា គ្រោងនឹងត្រូវបានពិចារណាដំណើរការប្រចាំឆ្នាំ នៅថ្ងៃចន្ទនេះ។

អ្នកនាំពាក្យរបស់ EU បានប្រាប់បណ្ដាញសារព័ត៌មានថា៖ «នៅឆ្នាំនេះ បន្ទាប់ពីមានការពិគ្រោះយ៉ាងប្រុងប្រយ័ត្ន និងទូលំទូលាយ EU បានសម្រេចរៀបចំសេចក្ដីសម្រេចមួយ ដោយមានធាតុផ្សំនៃការទទួលខុសត្រូវ ដោយស្នើឲ្យមានយន្តការស៊ើបអង្កេតឯករាជ្យ សម្រាប់អាហ្វហ្គានីស្ថាន។ យន្តការដែលត្រូវបានស្នើឡើងនេះ នឹងដោះស្រាយនិទណ្ឌភាពជាច្រើនទសវត្សរ៍ នៅអាហ្វហ្គានីស្ថាន»។

ដោយគូសបញ្ជាក់អំពីភាពអាក្រក់ឡើងៗនៃស្ថានភាពសិទ្ធិមនុស្ស នៅអាហ្វហ្គានីស្ថាន សេចក្តីព្រាងសេចក្ដីសម្រេចនេះ អំពាវនាវឲ្យមានការចាប់ផ្ដើមការស៊ើបអង្កេតឯករាជ្យដែលកំពុងបន្ត «ដើម្បីប្រមូល រៀបចំ និងរក្សាភស្តុតាង អំពីឧក្រិដ្ឋកម្មអន្តរជាតិ និងការរំលោភធ្ងន់ធ្ងរបំផុតលើច្បាប់អន្តរជាតិ»៕