អ្នកដើរលេងឡើងភ្នំរាប់រយនាក់ នៅតែជាប់លើភ្នំអេវឺរ៉េស (Mount Everest) បន្ទាប់ពីមានព្យុះព្រិលដ៏ខ្លាំងមួយ បានបោកបក់លើជម្រាលភាគខាងកើតរបស់ទីបេ ដែលនាំឲ្យមានប្រតិបត្តិការជួយសង្គ្រោះលើភ្នំដ៏ធំបំផុតក្នុងតំបន់ជាលើកដំបូង ក្នុងរយៈពេលជាច្រើនឆ្នាំ។

អ្នកឡើងភ្នំជាង ២០០នាក់ ត្រូវបានជាប់ នៅកម្ពស់ប្រហែល ៤.៩០០ម៉ែត្រ បន្ទាប់ពីព្យុះព្រិលកើតឡើងភ្លាមៗ បានវាយប្រហារជ្រលងភ្នំ Karama ជាផ្លូវដើរដ៏ពេញនិយមដែលនាំទៅដល់ផ្នែកខាងកើតរបស់ភ្នំ Everest។ ភ្នំនេះមានកំពស់ប្រហែល ៨.៨៥០ម៉ែត្រ។

គួរបញ្ជាក់ថា អាកាសធាតុអាក្រក់ធ្ងន់ធ្ងរ បានចាប់ផ្តើមឡើងកាលពីល្ងាចថ្ងៃសុក្រ (ទី៣ ខែតុលា) ហើយកាន់តែមានកម្រិតខ្លាំងឡើងៗ នៅចុងសប្តាហ៍។ ហេតុការណ៍នេះបានកើតឡើងក្នុងអំឡុងពេលថ្ងៃឈប់សម្រាក Golden Week រយៈពេល ៨ថ្ងៃរបស់ប្រទេសចិន ដោយមានអ្នកដើរលេងជាច្រើន បានសម្រុកទៅកាន់ភ្នំហិមាល័យ។

យោងតាមទូរទស្សន៍រដ្ឋចិន CCTV បានឲ្យដឹងថា អ្នកឡើងភ្នំប្រហែល ២៥០នាក់ ត្រូវបានជួយសង្គ្រោះរួចហើយ ប៉ុន្តែកិច្ចប្រឹងប្រែង នៅតែបន្តមាន ដើម្បីទៅដល់មនុស្ស ២០០នាក់ផ្សេងទៀត ដែលកំពុងទាក់ទងជាមួយអាជ្ញាធរ។

អ្នកស្រុក និងអ្នកជួយសង្គ្រោះរាប់រយនាក់ ត្រូវបានដាក់ពង្រាយ ដើម្បីសម្អាតព្រិលដែលបិទផ្លូវចូលទៅកាន់ផ្លូវភ្នំ។ រូបភាពវីដេអូដែលបានចែករំលែកនៅលើបណ្ដាញសង្គម បង្ហាញឲ្យឃើញនូវជួរដ៏វែងនៃក្រុមអ្នកជួយសង្គ្រោះដែលដឹកសេះ និងគោដើរកាត់ព្រិល៕