ប្រធានាធិបតីឆេក លោក Petr Pavel បាននិយាយថា ការបញ្ចប់គំនិតផ្ដួចផ្ដើមឆេក ក្នុងការបញ្ចូនគ្រាប់រំសេវទៅអ៊ុយក្រែន នឹងប៉ះពាល់ដល់សាធារណរដ្ឋឆេក ក៏ដូចជាសមត្ថភាពការពាររបស់ទីក្រុងគីវ ទល់នឹងរុស្ស៊ីផងដែរ ដោយការលើកឡើងនេះកើតមានបន្ទាប់ពីការបោះឆ្នោតកាលពីចុងសប្តាហ៍ ត្រូវបានបញ្ចប់ទៅដោយជ័យជម្នះធ្លាក់ទៅលើគណបក្សដែលបានបញ្ជាក់ថា ខ្លួនចង់បញ្ចប់កម្មវិធីនេះ។

ANO ដែលជាគណបក្សប្រឆាំងប្រជានិយមរបស់អតីតនាយករដ្ឋមន្ត្រី គឺលោកមហាសេដ្ឋី Andrej Babis បានលេចឡើងក្នុងនាមជាបក្សឈ្នះការបោះឆ្នោតសភា កាលពីថ្ងៃសៅរ៍ចុងសប្ដាហ៍កន្លងមក ដោយដណ្ដើមបាន ៨០កៅអី ក្នុងចំណោម ២០០អាសនៈ នៅក្នុងសភាជាន់ទាប។ ឥឡូវនេះ បក្សនេះកំពុងពិភាក្សាជាមួយភាគីនានា ដើម្បីទទួលបានសំឡេងភាគច្រើន។

នៅមុនការបោះឆ្នោត លោក Babis បាននិយាយថា លោកនឹងបញ្ចប់ការជំរុញដល់គំនិតផ្ដួចផ្ដើមផ្ដល់គ្រាប់រំសេវរបស់ប្រទេសឆេក ដោយចាត់ទុកកម្មវិធីនេះថា ថ្លៃជ្រុល និងមិនមានតម្លាភាព។ លោកនិយាយថា សហភាពអឺរ៉ុប (EU) និងអង្គការណាតូ (NATO) គួរតែដោះស្រាយបញ្ហានេះ។

យ៉ាងណាក្ដី លោក Pavel បាននិយាយនៅថ្ងៃចន្ទនេះថា៖ «ប្រសិនបើយើងកាត់បន្ថយ ឬសូម្បីតែបញ្ចប់ការគាំទ្រនេះ យើងនឹងបង្កគ្រោះថ្នាក់ដល់ខ្លួនយើងជាចម្បង ប៉ុន្តែការបញ្ចប់ការគាំទ្រនេះ ក៏នឹងជះឥទ្ធិពលអវិជ្ជមានដល់អ៊ុយក្រែនផងដែរ ប្រសិនបើមនុស្សជាច្រើនបានបាត់បង់ជីវិតរបស់ពួកគេ»។

កិច្ចប្រឹងប្រែងផ្ដល់គ្រាប់រំសេវ ដែលប្រមូលផ្តុំពាណិជ្ជករ និងមន្ត្រីការពារជាតិមកពីជុំវិញពិភពលោក ដើម្បីស្វែងរកគ្រាប់កាំភ្លើងធំរាប់លានគ្រាប់ សម្រាប់ទីក្រុងគីវ ដោយមានការផ្តល់ហិរញ្ញប្បទានពីបណ្តាប្រទេសលោកខាងលិច គឺជាកម្មវិធីគាំទ្រដ៏លេចធ្លោ សម្រាប់អ៊ុយក្រែន ក្រោមការដឹកនាំរបស់នាយករដ្ឋមន្ត្រីឆេក លោក Petr Fiala៕