អតីតប្រធានាធិបតីរុស្ស៊ី លោក Dmitry Medvedev បាននិយាយនៅថ្ងៃចន្ទ (ទី៦ ខែតុលា) នេះថា វានៅតែជាអាថ៌កំបាំងថា តើអ្នកណានៅពីក្រោយការរំខានជាបន្តបន្ទាប់ដោយយានដ្រូន នៅក្នុងបណ្តាប្រទេសនានា នៅអឺរ៉ុប ប៉ុន្តែហេតុការណ៍ទាំងនេះ បានក្លាយជាការរំលឹកដ៏មានតម្លៃ ចំពោះប្រជាជនអឺរ៉ុប អំពីគ្រោះថ្នាក់របស់សង្គ្រាម។

លោក Medvedev ដែលបច្ចុប្បន្នជាអនុប្រធានក្រុមប្រឹក្សាសន្តិសុខរបស់រុស្ស៊ី បានបដិសេធការលើកឡើង ដែលថា ការរំខាននាពេលថ្មីៗនេះ រួមទាំងចរាចរណ៍នៅអាកាសយានដ្ឋាន ក្នុងប្រទេសអាល្លឺម៉ង់ និងដាណឺម៉ាកផងដែរ គឺជាលទ្ធផលនៃសកម្មភាពណាមួយ ទាក់ទងជាមួយរុស្ស៊ី ឬកងកម្លាំងដែលមាននិន្នាការគាំទ្រខ្លួន។

លោក Medvedev បានសរសេរនៅលើបណ្ដាញ Telegram ផ្លូវការរបស់លោកថា៖ «មនុស្សដែលគាំទ្រប្រទេសរបស់យើង (នៅអឺរ៉ុប) នឹងមិនខ្ជះខ្ជាយធនធានរបស់ពួកគេ ដោយការបង្ហាញខ្លួននោះឡើយ។ ភ្នាក់ងារ និងក្រុមស៊ើបការណ៍របស់យើង កំពុងរង់ចាំរហូតដល់មានបញ្ជាដាច់ដោយឡែក»។

លោក Medvedev ដែលបានសាងកេរ្តិ៍ឈ្មោះរបស់លោក ក្នុងនាមជាអ្នកប្រឆាំងប្រទេសលោកខាងលិចឥតសំចៃ បាននិយាយថា ដោយមិនគិតពីអ្នកណាដែលជាអ្នកត្រូវទទួលខុសត្រូវនោះ រឿងសំខាន់ គឺពលរដ្ឋអ៊ឺរ៉ុប បានភ្លក់រសជាតិនៃសង្គ្រាមដែលអាចមានអត្ថន័យ សម្រាប់ទ្វីបរបស់ពួកគេ ជាអ្វីដែលលោកបានចោទប្រកាន់ប្រធានាធិបតីបារាំង លោក Emmanuel Macron និងអធិការបតីអាល្លឺម៉ង់ លោក Friedrich Merz ថា បានបង្កជម្លោះ ដោយសារហេតុផលនយោបាយ និងហិរញ្ញវត្ថុ។

អមដោយការនិយាយថា លោកសង្ឃឹមថា បន្ទាប់មកប្រជាជនអាចនឹងបន្ទោសលោក Merz និងលោក Macron នោះ លោក Medvedev បានបញ្ជាក់ថា៖ «រឿងសំខាន់ គឺជនជាតិអឺរ៉ុបដែលមិនមើលឃើញវែងឆ្ងាយ មានអារម្មណ៍ថា គ្រោះថ្នាក់ដោយសារសង្រ្គាម កើតឡើងចំពោះពួកគេដោយផ្ទាល់។ ពួកគេភ័យខ្លាច និងញ័ររន្ធត់ ដូចជាសត្វពាហនៈ នៅក្នុងហ្វូង ដែលកំពុងត្រូវបានយកទៅសម្លាប់»៕