អ៊ីស្រាអែល កំពុងប្រារព្ធខួបលើកទី២ នៃការវាយប្រហារកាលពីថ្ងៃទី៧ ខែតុលា ឆ្នាំ២០២៣ នៅក្នុងថ្ងៃអង្គារ ទី៧ ខែតុលា ឆ្នាំ២០២៥នេះ ខណៈក្រុមហាម៉ាស និងអ្នកចរចាអ៊ីស្រាអែល គ្រោងបន្តកិច្ចចរចាដោយប្រយោលដើម្បីបញ្ចប់សង្រ្គាម ២ឆ្នាំនៅហ្កាហ្សា ក្នុងថ្ងៃដដែលនេះនៅប្រទេសអេហ្ស៊ីប ក្រោមផែនការសន្តិភាពដែលបានស្នើឡើងរបស់សហរដ្ឋអាមេរិក។

គួររម្លឹកថា កាលពីពីរឆ្នាំមុននៅថ្ងៃទី៧ ខែតុលា ក្នុងពិធីបុណ្យមួយឈ្មោះ Sukkot របស់ជនជាតិជ្វីហ្វ ក្រុមសកម្មប្រយុទ្ធដឹកនាំដោយពួកហាម៉ាស បានបើកការវាយប្រហារដ៏ភ្ញាក់ផ្អើលឆ្លងព្រំដែនភាគខាងត្បូងអ៊ីស្រាអែល ដែលជាថ្ងៃមានមនុស្សស្លាប់ច្រើនបំផុតក្នុងប្រវត្តិសាស្ត្ររបស់ប្រទេសនេះ។

យុទ្ធជនប៉ាឡេស្ទីន បានទម្លុះព្រំដែនហ្កាហ្សា-អ៊ីស្រាអែល ដោយវាយលុកសហគមន៍អ៊ីស្រាអែលភាគខាងត្បូង និងចូលឆ្មក់ពិធីបុណ្យតន្ត្រីលើវាលខ្សាច់នោះ ជាមួយនឹងការបាញ់កាំភ្លើង គ្រាប់រ៉ូកែត និងគ្រាប់បែកដៃ។ យោងតាមតួលេខផ្លូវការរបស់អ៊ីស្រាអែល ការវាយប្រហារនេះបានសម្លាប់មនុស្សប្រមាណ ១.២១៩នាក់ នៅខាងអ៊ីស្រាអែល ដែលភាគច្រើនជាជនស៊ីវិល។

ក្រុមសកម្មប្រយុទ្ធក៏ចាប់មនុស្ស ២៥១នាក់ ជាចំណាប់ថ្នូរចូលទៅហ្កាហ្សា ដែលក្នុងនោះមាន ៤៧នាក់នៅតែជាប់ឃុំខ្លួន រួមទាំងមនុស្ស ២៥នាក់ ដែលយោធាអ៊ីស្រាអែលជឿថាបានស្លាប់បាត់ទៅហើយ។ ហេតុការណ៍នេះបានបញ្ឆេះសង្រ្គាមដ៏បង្ហូរឈាមនៅដែនដីហ្កាហ្សា មកទល់សព្វថ្ងៃ។ ពិធីរំលឹកវិញ្ញាណក្ខន្ធត្រូវកំណត់ពេលធ្វើឡើងទូទាំងប្រទេសអ៊ីស្រាអែល នៅថ្ងៃអង្គារនេះ។

ជាមួយគ្នានេះ កិច្ចពិភាក្សាបិទទ្វារថ្ងៃទីមួយ និងដោយប្រយោលរវាងអ៊ីស្រាអែល-ហាម៉ាស បានបញ្ចប់កាលពីថ្ងៃចន្ទ នៅទីក្រុងរមណីយដ្ឋាន Sharm El-Sheikh របស់អេហ្ស៊ីប ដោយមានអន្តរការីសម្រុះសម្រួល។ ប្រភពប៉ាឡេស្ទីនស្និទ្ធនឹងក្រុមចរចារបស់ហាម៉ាស បាននិយាយថា កិច្ចចរចាគ្រោងបន្តឡើងវិញនៅថ្ងៃអង្គារនេះ ហើយអាចអូសបន្លាយច្រើនថ្ងៃ៕