ប្រធានាធិបតីសហរដ្ឋអាមេរិក លោក Donald Trump បាននិយាយថា រថយន្តដឹកទំនិញធុនមធ្យមនិងធុនធ្ងន់ទាំងអស់ដែលនាំចូលមកក្នុងប្រទេសនឹងប្រឈមអត្រាដំឡើងពន្ធ២៥ភាគរយ ចាប់ពីថ្ងៃទី១ ខែវិច្ឆិកា ជាការកើនឡើងគួរឱ្យកត់សម្គាល់នៃកិច្ចខិតខំប្រឹងប្រែងរបស់លោកដើម្បីការពារក្រុមហ៊ុនរបស់សហរដ្ឋអាមេរិកពីការប្រកួតប្រជែងពីបរទេស។

កាលពីខែមុន លោក Trump បាននិយាយថា ការនាំចូលរថយន្តដឹកទំនិញធុនធ្ងន់នឹងត្រូវប្រឈមពន្ធថ្មីនៅថ្ងៃទី១ ខែតុលា លើមូលដ្ឋានសន្តិសុខជាតិ ដោយនិយាយថា ការដំឡើងពន្ធថ្មីគឺដើម្បីការពារក្រុមហ៊ុនផលិតពី «ការប្រកួតប្រជែងនៅខាងក្រៅដោយអយុត្តិធម៌» ហើយចំណាត់ការនេះនឹងផ្តល់ផលប្រយោជន៍ដល់ក្រុមហ៊ុនជាច្រើន។ ក្រោមកិច្ចព្រមព្រៀងពាណិជ្ជកម្មដែលបានឈានដល់ជាមួយប្រទេសជប៉ុន និងសហភាពអឺរ៉ុប សហរដ្ឋអាមេរិកបានព្រមព្រៀងការដំឡើងពន្ធ១៥ភាគរយលើយានយន្តធុនស្រាល ប៉ុន្តែវាមិនច្បាស់នោះទេថាតើអត្រាពន្ធនោះនឹងត្រូវកំណត់សម្រាប់រថយន្តធំជាងនេះឬយ៉ាងណា។

រដ្ឋបាល លោក Trump ក៏បានអនុញ្ញាតឱ្យក្រុមហ៊ុនផលិតដកតម្លៃនៃសមាសធាតុរបស់អាមេរិកពីការដំឡើងពន្ធដែលត្រូវបានបង់លើយានយន្តធុនស្រាលដែលបានដំឡើងនៅក្នុងប្រទេសកាណាដា និងប្រទេសម៉ិកស៊ិក។ យានយន្តធុនធំ រួមមានរថយន្តដឹកទំនិញ រថយន្តដឹកសំរាម រថយន្តក្រុង និងរថយន្តដឹកសិស្ស រថយន្តសណ្តោងត្រាក់ទ័រនិងយានយន្តធុនធ្ងន់ផ្សេងទៀត។

សភាពាណិជ្ជកម្មអាមេរិក បានជំរុញឱ្យក្រសួងពាណិជ្ជកម្មអាមេរិកកុំដំឡើងពន្ធលើរថយន្តដឹកទំនិញថ្មី ដោយកត់សម្គាល់ពីប្រភពនាំចូលកំពូលទាំងប្រាំគឺប្រទេសម៉ិកស៊ិក កាណាដា ជប៉ុន អាល្លឺម៉ង់ និងប្រទេសហ្វាំងឡង់ ដែល«សុទ្ធតែជាសម្ព័ន្ធមិត្ត ឬដៃគូជិតស្និទ្ធរបស់សហរដ្ឋអាមេរិក ដែលពុំមានការគំរាមកំហែងដល់សន្តិសុខជាតិរបស់សហរដ្ឋអាមេរិក។