បុគ្គលិកដឹកជញ្ជូនសាធារណៈក្នុងរដ្ឋធានីរបស់ប្រទេសប៉េរូ បានធ្វើកូដកម្មកាលពីថ្ងៃចន្ទ ទី៦ ខែតុលា ដើម្បីទាមទារឱ្យរដ្ឋាភិបាលចាត់វិធានការបន្ថែមទៀតក្នុងពេលមានការកើនឡើងឧក្រិដ្ឋកម្ម និងការជំរិតទារប្រាក់ ដោយបានបិទផ្លូវមួយចំនួននិងដុតសំបកកង់រថយន្តនៅភាគខាងជើងទីក្រុង។

នៅក្នុងសេចក្តីថ្លែងការណ៍ រដ្ឋាភិបាលបានជំរុញឱ្យនិយោជក អនុញ្ញាតឱ្យមានរយៈពេលអនុគ្រោះពីរម៉ោងសម្រាប់ការទៅដល់របស់បុគ្គលិក និងបានបញ្ជាឱ្យថ្នាក់រៀននៅក្នុងទីក្រុង Lima ត្រូវបានធ្វើឡើង «ពីចម្ងាយ» ជាការសម្រេចចិត្តមួយដែលត្រូវបានអនុម័តដោយសាកលវិទ្យាល័យរដ្ឋ និងឯកជនមួយចំនួន។

តាំងពីពេលព្រឹកព្រលឹម មនុស្សរាប់ពាន់នាក់បានតស៊ូឡើងលើយានយន្តដឹកជញ្ជូនសាធារណៈមួយចំនួនដែលកំពុងដំណើរការក្នុងទីក្រុងLima។ នគរបាលបានប៉ះទង្គិចជាមួយបាតុកររាប់សិបនាក់ដែលបានដុតកង់រថយន្ត ខណៈអ្នកបើកបរមួយក្រុមបានឈប់រថយន្តក្រុងនៅលើផ្លូវមួយដោយផ្អាកចរាចរណ៍មួយរយៈពេលខ្លី។

កូដកម្ម ត្រូវបានអំពាវនាវដោយសហជីពធំបំផុតមួយក្នុងវិស័យនេះ បន្ទាប់ពីអ្នកបើកបររថយន្តក្រុងម្នាក់ត្រូវបានបាញ់សម្លាប់ដោយជនមិនស្គាល់អត្តសញ្ញាណជិះលើម៉ូតូ នេះបើយោងតាមនគរបាល និងក្រុមហ៊ុនដឹកជញ្ជូន។ របាយការណ៍នៃការជំរិតទារប្រាក់នៅក្នុងប្រទេសប៉េរូបានកើនឡើងពី៣.៨៧២ករណីក្នុងឆ្នាំ ២០១៩ដល់ប្រហែល ២២.៤០០ករណី កាលពីឆ្នាំមុន នេះបើយោងតាមទិន្នន័យរបស់នគរបាលដែលចេញផ្សាយដោយសភាពាណិជ្ជកម្មទីក្រុងLima។ នៅចន្លោះខែមករា និងខែកញ្ញា ឆ្នាំនេះ វាបានឈានដល់ប្រហែល ១៨.៤៣០ករណី។