អ្នកនាំពាក្យវិមានក្រឹមឡាំង លោក Dmitry Peskov បាននិយាយកាលពីថ្ងៃចន្ទថា រុស្ស៊ី ចាត់ទុកសេចក្តីថ្លែងការណ៍របស់បណ្ដាមេដឹកនាំសហភាពអឺរ៉ុប រួមទាំងអធិការបតីអាល្លឺម៉ង់ លោក Friedrich Merz ដែលអូសទីក្រុងមូស្គូទៅពាក់ព័ន្ធនឹងការហោះហើរយានដ្រូននៅក្នុងផ្នែកផ្សេងៗនៃទ្វីបអឺរ៉ុបថាជាការចោទប្រកាន់គ្មានមូលដ្ឋាន ។

យោងតាមទីភ្នាក់ងារសារព័ត៌មានរដ្ឋ Tass របស់រុស្ស៊ី បានឲ្យដឹងថា លោក Peskov បានប្រាប់អ្នកសារព័ត៌មានថា មានអ្នកនយោបាយជាច្រើននៅអឺរ៉ុប ដែលឥឡូវនេះមានទំនោរងាកមកស្តីបន្ទោសរុស្ស៊ីចំពោះអ្វីគ្រប់យ៉ាង។ ពួកគេតែងតែធ្វើដូច្នេះដោយគ្មានមូលដ្ឋាន ។ នោះហើយជារបៀបដែលយើងមើលឃើញការចោទប្រកាន់ទាំងនេះ ។  

លោកបានសង្កត់ធ្ងន់ថា ក្រុមមេដឹកនាំសហភាពអឺរ៉ុប មិនគួរភ្ជាប់រាល់ការហោះហើរយានដ្រូនខុសពីធម្មតាទៅលើប្រទេសរុស្ស៊ីទេ ដោយជំរុញឱ្យពួកគេ ពង្រីកការយល់ដឹងរបស់ខ្លួន។ 

លោកថារឿងពាក់ព័ន្ធនឹងដ្រូនទាំងនេះគឺចម្លែក។ ប៉ុន្តែវាគ្មានហេតុផលដែលត្រូវស្តីបន្ទោសរុស្ស៊ីចំពោះរឿងនេះទេ។ ទើបតែថ្ងៃនេះលោកបានដឹងថាអ្នកចូលចិត្តការហោះហើរក្នុងស្រុកម្នាក់ត្រូវបានចាប់ខ្លួននៅក្នុងទីក្រុងមួយរបស់អឺរ៉ុប ខណៈពេលកំពុងសាកល្បងយានដ្រូន។ បុរសនោះមិនមានជាប់ពាក់ព័ន្ធជាមួយរុស្ស៊ីទេ។ នេះគឺជាឧទាហរណ៍ដ៏ជាក់លាក់តូចមួយ និងខុសគ្នាឆ្ងាយ ។

ក្នុងរយៈពេលប៉ុន្មានថ្ងៃថ្មីៗនេះ ប្រទេសជាច្រើននៅអឺរ៉ុបបានរាយការណ៍ពីការហោះហើរដ្រូនអណាមិក ដែលជំរុញឱ្យមានការបិទដែនអាកាសបណ្តោះអាសន្ន និងការជូនដំណឹងអំពីសុវត្ថិភាព៕