ប្រធានក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ អ.ស.ហ. លើកទឹកចិត្ត​ឱ្យ​បន្ត​ការ​អភិវឌ្ឍ​ទីផ្សារ​មូលបត្រដល់ក្រុមហ៊ុនក្នុងស្រុក ក្នុងការបោះផ្សាយលក់មូលបត្រជាសាធារណៈ ការ​បង្កើត​យន្តការ​គ្រប់គ្រងការជួញដូរទ្រព្យឌីជីថល និងការជំរុញការអភិវឌ្ឍទីផ្សារ ឧបករណ៍និស្សន្ទ ដែលជាថ្នាលលើកកម្ពស់ការគ្រប់គ្រងហានិភ័យហិរញ្ញវត្ថុជាដើម។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និង​ហិរញ្ញ​វត្ថុ​ និងជាប្រធានក្រុម ប្រឹក្សាអាជ្ញាធរសេវាហិរញ្ញវត្ថុមិនមែនធនាគារ លើកឡើងនៅក្នុង «សន្និសីទ​មូលបត្រប្រចាំឆ្នាំ ២០២៥ ក្រោមមូលបទ ៖ ការវិវត្តនៃវិ ស័យមូលបត្រ៖ ចីរភាព, នវានុវត្ត, បរិយាបន្ន និង ភាពធន់» នៅថ្ងៃទី ៧ ខែ តុលា ឆ្នាំ ២០២៥ នេះថា ការអភិវឌ្ឍ​វិស័យ​ហិរញ្ញ​វត្ថុ​ ត្រូវបានចាត់ទុកជាកម្លាំងចលករនៃសេដ្ឋ-កិច្ចជាតិ និងជាផ្នែកដ៏​សំខាន់​មួយ​នៃ​យុទ្ធសាស្ត្រ​បញ្ចកោណ-ដំណាក់កាលទី១ ក្នុងគោល បំណងជំរុញការអភិវឌ្ឍសេដ្ឋកិច្ច ប្រកប​ដោយ​ភាព​ធន់ និងបរិយាបន្ន, ដែលក្នុងនេះវិស័យមូលបត្របានដើរតួនាទីមួយដ៏ចម្បង។ ជាក់ ស្តែង, វិស័យមូលបត្រត្រូវបានកំណត់ជាអាទិភាពដ៏សំខាន់ ក្នុងបញ្ចកោណទី ២ និង​បញ្ច​កោណ​ទី៣ ​នៃយុទ្ធសាស្ត្របញ្ចកោណ-ដំណាក់កាលទី១ ដែលម្យ៉ាង, ផ្តោតលើការធ្វើពិពិធកម្មសេដ្ឋកិច្ច, ការ​បង្កើន​ភាពប្រកួតប្រជែង, ការធ្វើនវានុវត្តយន្តការហិរញ្ញប្បទាន និងផលិតផលហិរញ្ញវត្ថុ សម្រាប់​គាំទ្រ​ដល់ការវិនិយោគ តាមរយៈការដាក់ចេញនូវសកម្មភាពសំខាន់ៗរួមមាន៖ ការលើក​កម្ពស់​ការបោះផ្សាយលក់សញ្ញាបណ្ណបៃតង, សញ្ញាបណ្ណសង្គម, សញ្ញាបណ្ណនិរន្តរភាព និងសញ្ញា​បណ្ណ​ផ្សារ​ភា្ជប់និរន្តរភាព សម្រាប់វិស័យ ឯកជន; និងការដាក់ឲ្យដំណើរ​ការ​នូវ​ផលិត​ផល​ទ្រព្យ​ឌីជីថល​, ​មូលបត្រអនាគត, ការប្តូរមូលបត្រ (SWAP Securities) និង គម្រោង​វិនិយោគ​រួម​ជា​ដើម​។

ឯកឧត្តមអគ្គបណ្ឌិតសភាចារ្យ បន្តថា ក្រៅពីមូលដ្ឋានខាងលើ, គឺផ្តោត​លើ​ការ​អភិវឌ្ឍ​វិស័យ​ឯកជន​ និងការបង្កើនឱកាស ការងាររួមមាន៖ ការពង្រឹងប្រព័ន្ធធនាគារ និងវិស័យ​ហិរញ្ញ​វត្ថុ​មិន​មែន​ធនាគារ​ ដែលរួមបញ្ចូលនូវផ្នែកធំពីរគឺ, ទី១. ការបន្តអភិវឌ្ឍ ទីផ្សារមូលបត្រ​តាម​រយៈ​ការ​ជំរុញ​ និងការលើកទឹកចិត្តដល់ក្រុមហ៊ុនក្នុងស្រុក ដែលមានលក្ខណៈសម្បត្តិគ្រប់គ្រាន់ ឲ្យបោះ​ផ្សាយ​លក់​ មូលបត្រជាសាធារណៈ, ការបង្កើតយន្តការលើកទឹកចិត្តដល់វិនិយោគិន, ការបង្កើត​ប្រតិបត្តិករ​ទីផ្សារមូលបត្រអនាគត និងការបង្កើត យន្តការគ្រប់គ្រងការជួញដូរទ្រព្យឌីជីថល។ ទី២. ការជំរុញការអភិវឌ្ឍទីផ្សារឧបករណ៍និស្សន្ទ ដែលជាថ្នាលលើក-កម្ពស់ការគ្រប់គ្រង ហានិភ័យ​ហិរញ្ញវត្ថុ និងយន្តការកំណត់អត្រាការប្រាក់អនាគត តាមរយៈការរៀបចំ​ក្រប​ខណ្ឌ​គតិ​យុត្ត​, ការរៀបចំហេដ្ឋារចនាសម្ព័ន្ធ គាំទ្រ និងការទាក់ទាញតួអង្គផ្តល់សន្ទនីយភាព។

ឯកឧត្តមអគ្គបណ្ឌិតសភាចារ្យ បន្ថែមថា សម្រាប់ប្រទេសអភិវឌ្ឍន៍, ទីផ្សារ​មូល​បត្រ​មិន​មែន​គ្រាន់​តែ​ជា​យន្ត​ការ​ហិរញ្ញវត្ថុ ប៉ុណ្ណោះទេ ប៉ុន្តែថែមទាំងជាមូលដ្ឋានគ្រឹះ និងជាកាតាលីករ ដែលគាំទ្រ និង​ទ្រ​ទ្រង់ដល់កំណើនសេដ្ឋកិច្ចជាតិ និងសង្គម ព្រមទាំង ជាប៉ារ៉ាម៉ែត្រសម្រាប់វាស់ពីស្ថានភាព និង​សុខភាពសេដ្ឋកិច្ចផងដែរ។ ដោយឡែកសម្រាប់កម្ពុជា, ទីផ្សារមូលបត្របាននិងកំពុងដើរ តួនា​ទី​យ៉ាង​សំខាន់ក្នុងប្រព័ន្ធហិរញ្ញវត្ថុ ជាសសៃឈាមដ៏សំខាន់សម្រាប់សេដ្ឋកិច្ចជាតិ ក្នុងការជួយ​ជំរុញ​ និងការគាំទ្រដល់ការអភិវឌ្ឍ សេដ្ឋកិច្ចឲ្យមានការរីកចម្រើន ប្រកបដោយបរិយាបន្ន ជវភាព ភាពធន់ នវានុវត្ត និងចីរភា ។ តាមរយៈទីផ្សារមូលបត្រ, កម្ពុជាបាន បង្កើតឲ្យ​មាន​យន្ត​ការ​កាន់​តែ​សម្បូរ​បែប ក្នុងការកៀរគរទុន និងការវិនិយោគប្រកបដោយនវានុវត្ត និងចីរភាពតាមរយៈ៖ ទី១. ទីផ្សារ​មូលបត្រកម្មសិទ្ធិរួមមាន ទីផ្សារគោល និងទីផ្សារកំណើន; ទី២. ទីផ្សារសញ្ញាបណ្ណ; ទី៣. ទីផ្សារ គម្រោងវិនិយោគរួម; ទី៤. ទីផ្សារឧបករណ៍និស្សន្ទ; និងទី៥. ការសាកល្បង​បច្ចេក​វិទ្យា​ហិរញ្ញ​វត្ថុ ផលិតផល ឬសេវាកម្ម ដែលមាន លក្ខណៈនវានុវត្ត៕ អត្ថបទ៖ សុន រ៉ាឌី