ក្រុមអ្នកជំនាញសុខភាពបាននិយាយថា ការផ្ទុះជំងឺគ្រុនឈាមរបស់ប្រទេសបង់ក្លាដែស កាន់តែអាក្រក់ទៅៗយ៉ាងឆាប់រហ័ស ជាមួយនឹងការឆ្លង និងការស្លាប់កើនឡើងខ្លាំងទូទាំងប្រទេស ដោយព្រមានថា ជំងឺនេះអាចនឹងរីករាលដាលទប់មិនជាប់ ប្រសិនបើពុំមានកិច្ចប្រឹងប្រែងកម្ចាត់មូស ដែលជាភ្នាក់ងារចម្លងរោគ និងការសម្របសម្រួលជាបន្ទាន់ទេនោះ។

យោងតាមអគ្គនាយកដ្ឋានសេវាសុខភាព (DGHS) ជំងឺគ្រុនឈាម ៥០.៦៨៩ករណី និងការស្លាប់ ២១៥នាក់ ត្រូវបានរាយការណ៍ទូទាំងប្រទេសក្នុងឆ្នាំ២០២៥នេះ គិតត្រឹមថ្ងៃទី៦ ខែតុលា កន្លងទៅ។

បាណកវិទូ ឈ្មោះ Kabirul Bashar អ្នកជំនាញផ្នែកសត្វល្អិតនៅសាកលវិទ្យាល័យមួយរបស់បង់ក្លាដែស បាននិយាយថា ការផ្ទុះឡើងនៃជំងឺដែលបណ្តាលមកពីមូសខ្លាខាំនេះ បានធ្ងន់ធ្ងររួចទៅហើយក្នុងខែកញ្ញា កន្លងទៅ ហើយអាចប្រែទៅជា "គួរឱ្យបារម្ភខ្លាំងឡើង" ក្នុងខែតុលានេះ ដោយសារបម្រែបម្រួលអាកាសធាតុ និងភ្លៀងធ្លាក់ខុសប្រក្រតី។

ជាមួយនឹងមន្ទីរពេទ្យដែលស្ថិតក្រោមភាពតានតឹងខ្លាំងនិងការឆ្លងថ្មីនៅតែកើនឡើង មន្ត្រីសុខាភិបាលបារម្ភថា វិបត្តិនឹងកាន់តែជ្រៅទៅៗក្នុងប៉ុន្មានសប្តាហ៍ខាងមុខ។ ឆ្នាំដ៏អាក្រក់បំផុតរបស់បង់ក្លាដែស ក្នុងកំណត់ត្រាសម្រាប់ជំងឺគ្រុនឈាម គឺឆ្នាំ២០២៣ នៅពេលដែលជំងឺនេះបានសម្លាប់មនុស្ស ១.៧០៥នាក់ និងឆ្លងជាង ៣២១.០០០ករណី។ អ្នកជំនាញបានព្រមានថា ប្រទេសនេះអាចប្រឈមនឹងវដ្តនៃការបំផ្លិចបំផ្លាញមួយទៀត ប្រសិនបើវិធានការបង្ការមិនត្រូវបានធ្វើឡើងទេនោះ៕