អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei បាននិយាយកាលពីថ្ងៃចន្ទថា ប្រទេសអ៊ីរ៉ង់ គ្មានផែនការជួបចរចាជាមួយប្រទេសបារាំង អង់គ្លេស និងអាល្លឺម៉ង់ទេ បន្ទាប់ពីចំណាត់ការរបស់ប្រទេសទាំងនេះក្នុងការជំរុញឱ្យមានយន្តការ «អនុវត្តវិធានការដើម» ដើម្បីដាក់ទណ្ឌកម្មរបស់អង្គការសហប្រជាជាតិលើប្រទេសនេះឡើងវិញ។

លោក Baghaei បាននិយាយក្នុងសន្និសីទសារព័ត៌មានប្រចាំសប្តាហ៍នៅទីក្រុងតេអេរ៉ង់ថា អ៊ីរ៉ង់កំពុង «ពិចារណាលើផលប៉ះពាល់ និងផលវិបាក» នៃអ្វីដែលលោកហៅថា សកម្មភាពប្រឆាំងអ៊ីរ៉ង់នាពេលថ្មីៗនេះ ធ្វើឡើងដោយប្រទេសមហាអំណាចទាំងបីរបស់អឺរ៉ុប និងសហរដ្ឋអាមេរិក។

លោកបាននិយាយថា អ៊ីរ៉ង់នឹងសម្រេចលើផ្នែកការទូត «នៅពេលណាក៏ដោយ ដែលរដ្ឋាភិបាលគិតថា វាអាចទទួលបានផ្លែផ្កា» ដោយសង្កត់ធ្ងន់ថា ការចរចាណាមួយត្រូវតែបម្រើផលប្រយោជន៍ជាតិរបស់ប្រទេស។ លោក Baghaei និយាយថា «អ៊ីរ៉ង់នឹងមិនស្នើសុំការចរចាទេ» ហើយការចរចាជាដំណើរការពីរផ្លូវដែលត្រូវការពារផលប្រយោជន៍ជាតិ សន្តិសុខ និងសេចក្តីថ្លៃថ្នូរ។

ប្រទេសអឺរ៉ុបទាំងបី ក្នុងការសម្របសម្រួលជាមួយទីក្រុងវ៉ាស៊ីនតោន បានអំពាវនាវឱ្យមានយន្តការអនុវត្តវិធានការដើម នៅក្នុងខែសីហា បន្ទាប់ពីក្រុមប្រឹក្សាសន្តិសុខអង្គការសហប្រជាជាតិមិនបន្តការបន្ធូរបន្ថយទណ្ឌកម្មកាលពីក្នុងខែកញ្ញា។ អ៊ីរ៉ង់ បានបើកការចរចាជាច្រើនជុំជាមួយប្រទេសទាំងបី ចាប់តាំងពីខែកញ្ញាឆ្នាំមុន ដោយផ្តោតសំខាន់លើកម្មវិធីនុយក្លេអ៊ែរ និងការបន្ធូរបន្ថយទណ្ឌកម្មរបស់ខ្លួន។