ភ្លាមៗបន្ទាប់ពីនាយករដ្ឋមន្រ្តីបារាំង លោក Sebastien Lecornu បានលាលែងពីតំណែង ក្រោយចូលបំពេញការងារបានមិនដល់ ១ខែស្រួលបួលផង លោកប្រធានាធិបតី Emmanuel Macron ត្រូវបានថតពេលកំពុងដើរនៅតាមមាត់ស្ទឹងសែន (River Seine) ក្នុងទីក្រុងប៉ារីស ដោយលោកកំពុងជជែកយ៉ាងយកចិត្តទុកដាក់តាមទូរសព្ទ ខណៈក្រុមអង្គរក្សតាមការការពារសន្តិសុខក្នុងចម្ងាយមិនកៀកពេក។

អ្នកណាដែលលោក Macron កំពុងនិយាយជាមួយ ហើយបញ្ហាអ្វីដែលលោកកំពុងពិភាក្សានោះ នៅតែមិនត្រូវបានគេដឹងឡើយ។ ប៉ុន្តែរូបភាពនេះតំណាងឲ្យភាពឯកោខាងនយោបាយរបស់លោកប្រធានាធិបតីរូបនេះ ខណៈដែលរូបលោកប្រឈមនឹងជម្រើសកាន់តែតិច ដែលទាំងអស់នេះសុទ្ធតែមានហានិភ័យដូចគ្នា។

ហើយសំណួរត្រូវបានចោទឡើង នោះគឺថា តើលោក Macron ដែលត្រូវចុះចេញពីតំណែងជាប្រធានាធិបតីនៅឆ្នាំ២០២៧ បន្ទាប់ពីបានកាន់តួនាទីពេញ ២អាណត្តិ នឹងធ្វើអ្វីបន្ទាប់ពីនេះ? ខណៈនេះជាជម្រើសចំនួន ៤ ដែលបណ្ដាអ្នកវិភាគបានលើកឡើង តែគ្មាននរណាម្នាក់ផ្តល់ដំណោះស្រាយឆាប់រហ័សនោះឡើយ។

ទី១ គឺការតែងតាំងលោក Lecornu ឡើងវិញ ដោយលោក Macron ហាក់ដូចជាបានផ្តល់ឲ្យខ្លួនលោកនូវជម្រើសនេះ បន្ទាប់ពីអតីតរដ្ឋមន្ត្រីហិរញ្ញវត្ថុដ៏ស្មោះត្រង់ដែលការតែងតាំងជារដ្ឋមន្ត្រីការពារជាតិបង្កឲ្យមានវិបត្តិ គឺលោក Bruno Le Maire បាននិយាយថា លោកនឹងដកខ្លួនចេញពីរដ្ឋាភិបាល។ បន្ទាប់មក វិមាន Elysee បានប្រកាសថា លោក Lecornu ត្រូវបានផ្តល់រយៈពេល ២ថ្ងៃ ដើម្បីរៀបចំផែនការសកម្មភាពមួយ ដោយនាយករដ្ឋមន្ត្រី បានបញ្ជាក់ថា លោកនឹងរៀបចំ «ការពិភាក្សាចុងក្រោយ» ជាមួយ «ភាគីនយោបាយទាំងអស់»។

ទី២ គឺជ្រើសរើសនាយករដ្ឋមន្ត្រីថ្មី ហើយប្រសិនបើលោក Macron អនុវត្តវិធីសាស្ត្រ បុគ្គលនោះនឹងក្លាយជានាយករដ្ឋមន្ត្រីទី៨ ក្រោមការគ្រប់គ្រងរបស់លោក និងទី៣ ក្នុងរយៈពេលតែមួយឆ្នាំ ដែលវាមិនល្អនោះឡើយ សម្រាប់កេរ្តិ៍ឈ្មោះរបស់បារាំង។ ក្រុមឆ្វេងនិយមចង់ឲ្យលោកតែងតាំងបុគ្គលម្នាក់ដែលនឹងជំរុញដល់នយោបាយការចំណាយបន្ថែម។ ប៉ុន្តែភាពមិនច្បាស់លាស់នៅតែធំធេងដដែល ដែលថា លោក Macron នឹងធ្វើបែបនេះ ហើយបើទោះបីជាលោកបានធ្វើក៏ដោយ ក៏នាយករដ្ឋមន្ត្រីថ្មីប្រហែលជាមិនទទួលបានការគាំទ្រពីគ្រប់ក្រុមឆ្វេងនិយមនោះឡើយ។

ជម្រើសទី៣ គឺការបោះឆ្នោតមុនអាណត្តិ ជាអ្វីដែលលោក Macron តែងតែព្យាយាមមិនចង់ធ្វើដូច្នេះ បន្ទាប់ពីភាពប្រថុយប្រថាន ក្នុងការប្រកាសបែបនេះ កាលពីរដូវក្តៅឆ្នាំ២០២៤ មិនទទួលបានជោគជ័យ ហើយបានធ្វើឲ្យបារាំងមាននូវសភាមួយគ្មានសំឡេងភាគច្រើនដាច់ខាត។ ហើយអ្វីដែលសំខាន់ នោះគឺថា ការបោះឆ្នោតបែបនេះ អាចនាំឲ្យក្រុមស្ដាំជ្រុលនិយម គឺណបក្ស National Rally (RN) របស់លោកស្រី Marine Le Pen កាន់តែមានវត្តមាន នៅក្នុងសភា ហើយថែមទាំងផ្តល់ឱកាសឲ្យលោក Jordan Bardella ក្លាយជានាយករដ្ឋមន្ត្រីទៀតផង។

ជម្រើសចុងក្រោយ គឺថា លោក Macron ត្រូវលាលែងពីតំណែង ខណៈដែលលោកតែងតែច្រានចោលជានិច្ច មុនពេលអាណត្តិរបស់លោកត្រូវបញ្ចប់ ហើយប្រសិនបើលោកសម្រេចបែបនោះ វានឹងបើកផ្លូវឲ្យមានការបោះឆ្នោតប្រធានាធិបតីមុនកាលកំណត់។ តែយ៉ាងណាក្ដី សម្ពាធកំពុងតែមានលើលោកប្រធានាធិបតីរូបនេះដែលមិនធា្លប់មានពីមុនមកឡើយ៕