រដ្ឋដែលមានប្រជាជនច្រើនជាងគេរបស់ប្រទេសអូស្ត្រាលី បានរិះគន់ផែនការរបស់ក្រុមគាំទ្រប៉ាឡេស្ទីន ក្នុងការរៀបចំព្រឹត្តិការណ៍តវ៉ា នៅទីក្រុងស៊ីដនី នាថ្ងៃអង្គារ (ទី៧ ខែតុលា) នេះ ជាខួបលើកទី២ នៃការវាយប្រហារដោយក្រុមសកម្មប្រយុទ្ធហាម៉ាស ពោលគឺជាហេតុការណ៍ដែលបានសម្លាប់ជនជាតិអ៊ីស្រាអែលចំនួន ១.២០០នាក់ និងបង្កឲ្យមានសង្រ្គាមបង្ហូរឈាម នៅតំបន់ហ្កាហ្សា។

ចាប់តាំងពីពេលនោះមក ការវាយប្រហារដោយយោធារបស់អ៊ីស្រាអែល បានសម្លាប់ជនជាតិប៉ាឡេស្ទីនជាង ៦៧.០០០នាក់ និងបានធ្វើឲ្យអ្នកស្រុកហ្កាហ្សាភាគច្រើននៃចំនួន ២,២លាននាក់គ្មានផ្ទះសម្បែង និងអត់ឃ្លាននៅក្នុងដែនដីដែលត្រូវបានបំផ្លាញដោយការទម្លាក់គ្រាប់បែកឥតស្រាកស្រាន្ត។

ក្រុម Stand for Palestine Australia កំពុងរៀបចំព្រឹត្តិការណ៍ «លើកតម្កើងទុក្ករបុគ្គលរបស់យើង» នាល្ងាចថ្ងៃទី៧ ខែតុលា នៅជាយក្រុង Bankstown នៃទីក្រុងស៊ីដនី ដោយនាំឲ្យមានការថ្កោលទោសពីលោក Chris Minns រដ្ឋមន្ត្រីប្រចាំរដ្ឋ New South Wales ដែលរួមមានទីក្រុងស៊ីដនីផងដែរ។

លោក Minns បានប្រាប់ស្ថានីយវិទ្យុ 2GB ថា៖ «វាគឺជាពេលវេលាមិនគួរ និងខ្វះការគោរពខ្លាំងណាស់។ យើងយល់ថា មានការព្រួយបារម្ភ អំពីជនស៊ីវិលប៉ាឡេស្ទីនស្លូតត្រង់ នៅតំបន់ហ្កាហ្សា ប៉ុន្តែក្នុងការរៀបចំព្រឹត្តិការណ៍នេះ នៅថ្ងៃទី៧ ហាក់ដូចជាពួកគេកំពុងលើកតម្កើងសកម្មភាពរបស់ពួកភេរវករហាម៉ាស ជាជាងបង្ហាញកង្វល់ ចំពោះអ្នកដែលរស់នៅក្នុងតំបន់ហ្កាហ្សា»៕