រដ្ឋអាជ្ញាប្រទេសហ្សកហ្ស៊ីកាលពីថ្ងៃចន្ទបានចោទប្រកាន់មេដឹកនាំគណបក្សប្រឆាំងចំនួនប្រាំរូបពីបទប៉ុនប៉ងផ្តួលរំលំរដ្ឋាភិបាលបន្ទាប់ពីការតវ៉ាកាលពីថ្ងៃសៅរ៍សប្តាហ៍មុនដែលបានឈានដល់ការប៉ះទង្គិចគ្នារវាងនគរបាលនិងបាតុករនៅក្នុងរដ្ឋធានី Tbilisi របស់ប្រទេស។

ក្រសួងមហាផ្ទៃ បាននិយាយថា មនុស្ស ១៣ នាក់ត្រូវបានចាប់ខ្លួនពាក់ព័ន្ធនឹងភាពវឹកវរនេះ។

បាតុករប្រឆាំងរដ្ឋាភិបាលរាប់ម៉ឺននាក់បានប្រមូលផ្តុំគ្នានៅទីលានសេរីភាព(Freedom Square) ក្នុងទីក្រុង Tbilisi ខណៈប្រទេសដែលមានប្រជាជនចំនួន៣,៧លាននាក់បានបោះឆ្នោតក្នុងការបោះឆ្នោតតំបន់។ មេដឹកនាំមួយចំនួនបានសន្យាថានឹងមាន «បដិវត្តន៍ដោយសន្តិវិធី» ទោះបីជាប្លុកប្រឆាំងធំបំផុតបានធ្វើពហិការការបោះឆ្នោតក៏ដោយ។

ទោះជាយ៉ាងណា ក្រុមបាតុករមួយក្រុមតូចបានព្យាយាមចូលទៅក្នុងវិមានប្រធានាធិបតីប៉ុន្មាននាទីមុនពេលការបោះឆ្នោតបិទ។ ពួកគេត្រូវបានរុញច្រានវិញដោយនគរបាលបង្ក្រាបកុបកម្ម ប្រើប្រាស់ឧស្ម័ន និងកាណុងបាញ់ទឹក។

ការចោទប្រកាន់លើមនុស្សចំនួនប្រាំនាក់ មានទោសជាប់ពន្ធនាគារអតិបរមា៩ឆ្នាំ។ ក្នុងចំណោមអ្នកដែលត្រូវបានចាប់ខ្លួននោះក៏មានអ្នកចម្រៀងអូប៉េរ៉ាដ៏ល្បីលើពិភពលោក និងជាសកម្មជន ឈ្មោះ Paata Burchuladze ដែលបានអានសេចក្តីប្រកាសមួយដែលអះអាងថា «អំណាចប្រគល់ទៅឲ្យប្រជាជនវិញ» និងបានហៅរដ្ឋាភិបាលថា «មិនស្របច្បាប់»។