តុលាការថៃបានកាត់ទោសអតីតមេដឹកនាំបាតុករអាវក្រហមចំនួន ១១រូប នៅថ្ងៃអង្គារ (ទី៧ តុលា) ជុំវិញតួនាទីរបស់ពួកគេក្នុងបាតុកម្មប្រឆាំងរដ្ឋាភិបាលឆ្នាំ២០១០ ជាហេតុការណ៍ដែលបានបញ្ចប់ដោយការបង្ក្រាបពីកងទ័ព រហូតបណ្តាលឲ្យមនុស្សស្លាប់រាប់សិបនាក់ ។

ក្រុម «អាវក្រហម» ដែលជាអ្នកគាំទ្រអតីតនាយករដ្ឋមន្ត្រី លោក Thaksin Shinawatra (ថាក់ស៊ីន ស៊ីណាវ៉ាត់) ត្រូវបានរកឃើញថា មានទោសពីបទរំលោភច្បាប់គ្រាអាសន្ន ដែលត្រូវបានដាក់អំឡុងការតវ៉ានោះដែលព្យាយាមទម្លាក់នាយករដ្ឋមន្ត្រីនាពេលនោះ គឺលោក Abhisit Vejjajiva (អាប់ភីស៊ីត វេចាជីវ៉ា)។

ក្រុមបាតុករអាវក្រហមរាប់ម៉ឺននាក់ បានកាន់កាប់ផ្លូវប្រសព្វសំខាន់ៗជាច្រើន នៅក្នុងទីក្រុងបាងកក កាលពីឆ្នាំ២០១០ ដោយខ្លះប្រមូលផ្តុំគ្នានៅក្នុងជំរុំតវ៉ាដែលមានការពារយ៉ាងរឹងមាំ ហើយបានប៉ះទង្គិចជាមួយអាជ្ញាធរ។

ការប្រមូលផ្តុំគ្នាតវ៉ានេះ បានធ្វើឡើងបន្ទាប់ពីលោក ថាក់ស៊ីន ត្រូវបានរកឃើញថា មានទោសពីបទពុករលួយ បន្ទាប់ពីរូបលោកត្រូវបានទម្លាក់ចេញអំណាច ដោយរដ្ឋប្រហារពីយោធា កាលពីឆ្នាំ២០០៦ ហើយបានរត់ភៀសខ្លួនចេញពីប្រទេស។

ការតវ៉ាឆ្នាំ២០១០ នោះ បានបិទអគាររដ្ឋាភិបាលអស់រយៈពេលជាង ២ខែ ហើយបានបញ្ចប់នៅពេលដែលទាហាន បានប្រើប្រាស់គ្រាប់ពិត ដើម្បីបំបែកបាតុករចេញពីកណ្តាលទីក្រុងបាងកក។ អង្គការឃ្លាំមើលសិទ្ធិមនុស្ស បានឲ្យដឹងថា យ៉ាងហោចណាស់មនុស្ស ៩០នាក់ ត្រូវបានសម្លាប់ ក្នុងអំឡុងពេលមានភាពចលាចលនោះ ដែលជាភាពច្របូកច្របល់មួយ ក្នុងចំណោមហេតុការន៍នយោបាយដ៏អាក្រក់បំផុតរបស់ថៃ ហើយជាង ២.០០០នាក់ បានរងរបួស។

លោក Jatuporn Prompan បានប្រាប់បណ្ដាញសារព័ត៌មានថា តុលាការព្រហ្មទណ្ឌក្រុងបាងកក នៅថ្ងៃទី៧ ខែតុលានេះ បានកាត់ទោសមេដឹកនាំតវ៉ា ៥នាក់ ក្នុងនោះរួមទាំងរូបលោកដែលជាសកម្មជនដ៏លេចធ្លោផងដែរ ឲ្យជាប់ពន្ធនាគាររយៈពេល ៤ឆ្នាំ និង ៤ខែ ខណៈដែលមនុស្ស ៦នាក់ផ្សេងទៀត បានទទួលទោសរយៈពេល ៤ខែ ហើយ ២នាក់ត្រូវបានឲ្យរួចខ្លួន៕