ឆ្មាំល្បាតឆ្នេររបស់ប្រទេសក្រិក នៅថ្ងៃអង្គារ (ទី៧ ខែតុលា) នេះ បានឲ្យដឹងថា ជនអន្តោប្រវេសន៍ចំនួន ៤នាក់ បានបាត់បង់ជីវិត ក្រោយទូកដឹកពួកគេ បានលិចនៅម្ដុំកោះ Lesbos របស់ក្រិក បន្ទាប់ពីមានប្រតិបត្តិការស្វែងរក និងជួយសង្គ្រោះ នៅក្នុងតំបន់នោះ។

មន្ត្រីឆ្មាំល្បាតឆ្នេរ បានបញ្ជាក់ថា រហូតមកដល់ពេលនេះ ជនអន្តោប្រវេសន៍ ៣៤នាក់ ត្រូវបានរកឃើញដោយសុវត្ថិភាព នៅឆ្នេរភាគខាងត្បូងនៃកោះ ដោយបន្ថែមថា យ៉ាងហោចណាស់មាននាវាចំនួន ៣គ្រឿង និងឧទ្ធម្ភាគចក្រ ១គ្រឿង បានជួយដល់ប្រតិបត្តិការនេះ។ សាកសព ៤នាក់ត្រូវបានរកឃើញនៅសមុទ្រ។

របាយការណ៍បឋម បានបង្ហាញថា មានមនុស្សសរុប ៣៨នាក់ជិះនៅលើទូក។ មូលហេតុដែលនាំឲ្យមានឧបទ្ទវហេតុមិនច្បាស់លាស់នោះឡើយ។

គួរបញ្ជាក់ថា ក្រិក គឺជាប្រទេសមួយ នៅក្នុងចំណោមប្រទេសប៉ះពាល់ដោយវិបត្តិជនអន្តោប្រវេសន៍ឆ្នាំ ២០១៥-២០១៦ នៅពេលដែលមនុស្សជាង ១លាននាក់ បានភៀសខ្លួនចេញពីសង្រ្គាម និងភាពក្រីក្រ នៅតំបន់មជ្ឈិមបូព៌ា និងអាហ្វ្រិក ឆ្លងចូលទៅទ្វីបអឺរ៉ុប។

លំហូរជនអន្តោប្រវេសន៍បានធ្លាក់ចុះជាលំដាប់។ ប៉ុន្តែថ្មីៗនេះ ប្រទេសតំបន់មេឌីទែរ៉ាណេមួយនេះ បានរឹតបន្តឹងច្បាប់ទេសន្តរប្រវេសន៍ បន្ទាប់ពីមានការកើនឡើងវិញនូវការមកដល់ពីប្រទេសលីប៊ី តាមរយៈកោះរបស់ក្រិកចំនួន ២ គឺ Crete និង Gavdos៕