បាល់ទាត់៖ ការប្រកួតបាល់ទាត់ដណ្ដើមពានរង្វាន់ឯកឧត្តម គង់ សោភ័ណ្ឌ អភិបាលនៃគណៈអភិបាលខេត្តកណ្ដាល បានបើកការប្រកួតផ្លូវការហើយកាលពីល្ងាចថ្ងៃទី០២ ខែកុម្ភៈ ឆ្នាំ២០២២ នៅកីឡដ្ឋានខេត្តកណ្ដាលដោយមាន ១៨ក្រុមចូលរួម។ ពិធីបើកការប្រកួតនេះបានធ្វើឡើងក្រោមវត្តមានផ្ទាល់របស់ឯកឧត្តម គង់ សោភ័ណ្ឌ។
ឯកឧត្តម ធុល នាង ប្រធានគណៈកម្មការរៀបចំការប្រកួតបានគូសបញ្ជាក់ថា ពានរង្វាន់អភិបាលខេត្តកណ្ដាលនេះរៀបចំឡើងក្រោមការគាំទ្រពីឯកឧត្តម គង់ សោភ័ណ្ឌ និងថ្នាក់ដឹកនាំអង្គភាពចំនួន ៤ ដែលទទួលបានគោលការណ៍អនុវត្ត រួមមានមន្ទីរបណ្ដុះបណ្ដាលវិជ្ជាជីវខេត្តកណ្ដាល រដ្ឋបាលស្រុកល្វាឯម រដ្ឋបាលស្រុកមុខកំពូល និងរដ្ឋបាលស្រុកខ្សាច់កណ្ដាល។ ឯកឧត្តម គង់ សោភ័ណ្ឌ មានប្រសាសន៍ថា គោលបំណងនៃការផ្ដួចផ្ដើមគំនិតរៀបចំព្រឹត្តិការណ៍នេះ គឺដើម្បីបំផុសស្មារតីបំផុសចលនាយុវជននៅតាមបណ្តាក្រុង-ស្រុក និងមន្ទីរជំនាញជុំវិញខេត្ត ក៏ដូចជាវិស័យឯកជនដែលស្រលាញ់វិស័យកីឡាមានឱកាសបង្ហាញសមត្ថភាព ទេពកោសល្យ ហើយក្លាយជាធនធានតំណាងខេត្ត សម្រាប់ឈានទៅចូលរួមការប្រកួតថ្នាក់ជាតិ និងអន្ដរជាតិ ពិសេសគឺគាំទ្រយុទ្ធនាការប្រជាជនម្នាក់លេងកីឡាមួយមុខ ដើម្បីដំណើរឆ្ពោះទៅស៊ីហ្គេម-អាស៊ានប៉ារ៉ាហ្គេមឆ្នាំ២០២៣ នៅកម្ពុជាផងដែរ។
ឯកឧត្តមបន្ដថា រាជរដ្ឋាភិបាលកម្ពុជាបានយកចិត្តទុកដាក់ខ្លាំង លើការអភិវឌ្ឍសក្តានុពលធនធានមនុស្សក្នុងវិស័យកីឡា ដោយបានដាក់ចេញនូវផែនការអភិវឌ្ឍន៍ តាមរយៈការអនុវត្តគោលនយោបាយលើកស្ទួយវិស័យកីឡា និងការកសាងហេដ្ឋារចនាសម្ព័ន្ធរូបវន្តនានា ដែលបម្រើដល់វិស័យកីឡា។ តាមរយៈនេះ ឯកឧត្តមក៏សង្ឃឹមថា ការប្រកួតពានរង្វាន់អភិបាលខេត្តកណ្ដាលនេះ នឹងចូលរួមលើកស្ទួយវិស័យកីឡាជាតិ និងបំផុសប្រជាពលរដ្ឋឲ្យចូលរួមលេងកីឡាកាន់តែច្រើនផងដែរ។ គួរបញ្ជាក់ថា ការប្រកួតបាល់ទាត់ដណ្ដើមពានរង្វាន់អភិបាលខេត្តកណ្ដាលឆ្នាំ២០២២ នេះគឺមាន ១៨ក្រុមចូលរួមមកពីមន្ទីរ រដ្ឋបាលក្រុង-ស្រុកទាំង ១១ និងវិស័យឯកជនក្នុងខេត្តកណ្ដាល ហើយបានបែងចែកជា ៤ពូលក្នុងមួយពូលមាន ៤ក្រុម និង ៥ក្រុម។ រីឯការប្រកួតគ្រោងនឹងបិទបញ្ចប់នៅថ្ងៃទី១៣ ខែមីនា ឆ្នាំ២០២២ ខាងមុខ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
