នាយករដ្ឋមន្រ្តីប្រទេសកាណាដា លោក Mark Carney បានជួបជាមួយប្រធានាធិបតីសហរដ្ឋអាមេរិក លោក Donald Trump នៅសេតវិមានកាលពីថ្ងៃអង្គារ ទី៧ ខែតុលា ដោយស្វែងរកការបន្ធូរបន្ថយការដំឡើងពន្ធរបស់សហរដ្ឋអាមេរិកដែលកំពុងធ្វើឲ្យប៉ះពាល់ដល់សេដ្ឋកិច្ចរបស់ប្រទេសកាណាដានិងប្រជាប្រិយភាពរបស់លោកនៅក្នុងស្រុក។

លោក Carney កំពុងធ្វើទស្សនកិច្ចលើកទីពីររបស់លោកទៅកាន់ការិយាល័យពងក្រពើ ចាប់តាំងពីខែមេសា ប៉ុន្តែមិនដូចសម្ព័ន្ធមិត្តផ្សេងទៀតរបស់សហរដ្ឋអាមេរិកនោះទេ កាណាដានៅតែមិនទាន់បានចុះហត្ថលេខាលើកិច្ចព្រមព្រៀងជាមួយទីក្រុងវ៉ាស៊ីនតោន ដើម្បីបន្ទន់ខ្លួនពីសង្រ្គាមពាណិជ្ជកម្មរបស់លោក Trump នៅឡើយ។

អតីតប្រធានធនាគារកណ្តាលវ័យ៥០ឆ្នាំរូបនេះ បានចូលប្រឡូកក្នុងឆាកនយោបាយមិនទាន់បានមួយឆ្នាំនៅឡើយទេ ប៉ុន្តែបច្ចុប្បន្ននេះប្រឈមនឹងការរិះគន់កាន់តែខ្លាំងឡើងនៅក្នុងស្រុក ជាកន្លែងដែលលោកបានធ្វើយុទ្ធនាការលើការពិសោធន៍គ្រប់គ្រងវិបត្តិដ៏ទូលំទូលាយរបស់លោក។

លោក Trump បាននិយាយនៅពេលត្រូវបានសួរអំពីដំណើរទស្សនកិច្ចរបស់ លោក Carney ថា «ខ្ញុំគិតថាលោក Carney នឹងសួរអំពីការដំឡើងពន្ធ ព្រោះក្រុមហ៊ុនជាច្រើនមកពីប្រទេសកាណាដាកំពុងផ្លាស់ប្តូរទៅកាន់សហរដ្ឋអាមេរិក»។

រដ្ឋាភិបាលកាណាដា បាននិយាយថាក្នុងអំឡុងពេល «ទស្សនកិច្ចការងារ» របស់លោក Carney ថា លោកកំពុងស្វែងរកការស្តារឡើងវិញទំនាក់ទំនងទ្វេភាគី និងពិភាក្សាអំពី «អាទិភាពរួមនៅក្នុងទំនាក់ទំនងសេដ្ឋកិច្ច និងសន្តិសុខថ្មីរវាងកាណាដា និងសហរដ្ឋអាមេរិក»។ សហរដ្ឋអាមេរិក គឺជាដៃគូសេដ្ឋកិច្ចដ៏សំខាន់របស់កាណាដា ដោយ៧៥ភាគរយនៃការនាំចេញរបស់ប្រទេសកាណាដា ត្រូវបានលក់ឆ្លងកាត់ព្រំដែនភាគខាងត្បូងរបស់ខ្លួន។ ប្រទេសកាណាដា បានឃើញផលិតផលក្នុងស្រុកសរុបរបស់ខ្លួនធ្លាក់ចុះ១,៥ភាគរយនៅក្នុងត្រីមាសទី២ដោយកំពុងបន្ថែមសម្ពាធសេដ្ឋកិច្ច។