ការគំរាមកំហែងរបស់ លោក Donald Trump ក្នុងការយកមកប្រើច្បាប់ប្រឆាំងការបះបោររបស់សហព័ន្ធដើម្បីពង្រីកការដាក់ពង្រាយបុគ្គលិកយោធារបស់លោកទៅកាន់ទីក្រុងនានាក្នុងសហរដ្ឋអាមេរិកបានបង្កើនការតតាំងខាងផ្លូវច្បាប់របស់លោកជាមួយទីក្រុងនានាដែលដឹកនាំដោយក្រុមប្រជាធិបតេយ្យលើសិទ្ធិអំណាចប្រធានាធិបតី ខណៈកងទ័ពឆ្មាំជាតិរាប់រយនាក់មកពីរដ្ឋតិចសាស់បានត្រៀមដើម្បីចេញល្បាតនៅតាមដងផ្លូវក្នុងទីក្រុង Chicago ។

លោកប្រធានាធិបតី បានប្រាប់អ្នកសារព័ត៌មានថា លោកនឹងពិចារណាប្រើប្រាស់ច្បាប់ប្រឆាំងការបះបោរ ជាច្បាប់មួយដែលបានអនុម័តកាលពីជាងពីរសតវត្សមុន ដើម្បីបញ្ចៀសសេចក្តីសម្រេចរបស់តុលាការដែលដាក់ការរឹតត្បិតលើបញ្ជារបស់លោកក្នុងការបញ្ជូនកងទ័ពឆ្មាំជាតិចូលទៅក្នុងទីក្រុងនានាជុំវិញការជំទាស់របស់មន្ត្រីក្នុងតំបន់ និងរដ្ឋ។

នៅក្រោមច្បាប់សហព័ន្ធ ឆ្មាំជាតិនិងកងទ័ពយោធា ជាទូទៅត្រូវបានហាមឃាត់មិនឱ្យអនុវត្តច្បាប់ស៊ីវិល។ ប៉ុន្តែច្បាប់ប្រឆាំងការបះបោរ ដំណើរការជាករណីលើកលែងចំពោះច្បាប់នោះ ហើយនឹងផ្តល់អំណាចដល់កងទ័ព និងនគរបាលដោយផ្ទាល់ និងចាប់ខ្លួនមនុស្ស។

កាលពីសប្តាហ៍មុន នៅក្នុងសុន្ទរកថាទៅកាន់មេបញ្ជាការយោធាជាន់ខ្ពស់ លោក Trump បានស្នើឱ្យប្រើប្រាស់ទីក្រុងនានារបស់សហរដ្ឋអាមេរិកជា «កន្លែងហ្វឹកហាត់» សម្រាប់កងកម្លាំងប្រដាប់អាវុធ ដែលធ្វើឲ្យស្រឡាំងកាំងដល់គណបក្សប្រជាធិបតេយ្យ និងក្រុមសេរីភាពស៊ីវិល។

លោក Trump បានបញ្ជាឱ្យកងទ័ពឆ្មាំជាតិទៅកាន់ទីក្រុង Chicago ជាទីក្រុងធំបំផុតទីបីរបស់សហរដ្ឋអាមេរិក និងទីក្រុងPortland រដ្ឋ Oregon បន្ទាប់ពីការដាក់ពង្រាយកាលពីពេលមុនរបស់លោកទៅកាន់ទីក្រុង Los Angeles និងទីក្រុង Washington, D.C. ដែលក្នុងករណីនីមួយៗលោកត្រូវធ្វើដូច្នេះ ទោះបីជាមានការប្រឆាំងយ៉ាងខ្លាំងក្លាពីអភិបាលក្រុងនិងអភិបាលរដ្ឋរបស់គណបក្សប្រជាធិបតេយ្យក៏ដោយ។