ប្រធានាធិបតីបារាំង លោក Emmanuel Macron បានប្រឈមមុខនឹងសម្ពាធកាន់តែខ្លាំងឡើងកាលពីថ្ងៃអង្គារ (៧ តុលា) ឱ្យលាលែងពីតំណែង ឬរៀបចំការបោះឆ្នោតសភាមុនអាណត្តិ ដើម្បីបញ្ចប់ភាពចលាចលខាងនយោបាយ ដែលបានបង្ខំនាយករដ្ឋមន្ត្រីចំនួន ៥រូបហើយ ឱ្យលាលែងពីតំណែងក្នុងរយៈពេលតិចជាងពីរឆ្នាំ។

ប្រធានាធិបតីកណ្តាលនិយមរបស់បារាំងវ័យ ៤៧ឆ្នាំរូបនេះ បាននិយាយម្តងហើយម្តងទៀតថា លោកនឹងបន្តកាន់តំណែងឱ្យផុតអាណត្តិទីពីររបស់ខ្លួន ដែលនឹងបញ្ចប់នៅឆ្នាំ២០២៧។ ទោះយ៉ាងនេះក្ដី ការអំពាវនាវឱ្យលោកចុះពីតំណែងកាន់តែកើនឡើង ក្នុងអំឡុងវិបត្តិនយោបាយដ៏អាក្រក់បំផុតមួយចាប់តាំងពីការបង្កើតសាធារណរដ្ឋទីប្រាំ ដែលជាប្រព័ន្ធរដ្ឋាភិបាលបច្ចុប្បន្នរបស់បារាំង នៅឆ្នាំ១៩៥៨មក។

កាលពីថ្ងៃអង្គារដដែលនោះ នាយករដ្ឋមន្រ្តីដែលកំពុងចុះពីតំណែងរបស់លោក Macron គឺលោក Sebastien Lecornu បានធ្វើកិច្ចចរចាចុងក្រោយដើម្បីបង្កើតរដ្ឋាភិបាលថ្មី ប៉ុន្តែនាយករដ្ឋមន្ត្រីទីមួយរបស់លោក Macron នៅឆ្នាំ២០១៧ គឺលោក Edouard Philippe បាននិយាយថា ដល់ពេលហើយដែលបារាំងមានប្រធានាធិបតីថ្មីដើម្បីបំបែកភាពជាប់គាំង និងបញ្ចប់ភាពរញ៉េរញៃនេះ។

ចលាចលនយោបាយក្នុងសេដ្ឋកិច្ចធំទីពីររបស់តំបន់ចាយប្រាក់អឺរ៉ូមួយនេះ គឺជាព័ត៌មានទំព័រមុខនៅទូទាំងអឺរ៉ុប ស្របពេលដែលប្រធានាធិបតីអាមេរិក លោក Donald Trump កំពុងទាមទារឱ្យទ្វីបនេះប្រឹងប្រែងបន្ថែមទៀតដើម្បីពង្រឹងការការពារ និងផ្ដល់ជំនួយឱ្យអ៊ុយក្រែន។ ទីផ្សារសកលមានការភ័យខ្លាច ដោយវិនិយោគិនកំពុងតាមដានយ៉ាងដិតដល់លើរឿងនេះ៕