ប្រធានាធិបតីអាមេរិក លោក Donald Trump ទទូចថា សហរដ្ឋអាមេរិកនឹង «ធ្វើអ្វីគ្រប់យ៉ាងដែលអាចធ្វើបាន» ដើម្បីរារាំងអ៊ីស្រាអែលកុំឲ្យចាប់ផ្តើមសង្គ្រាម នៅតំបន់ហ្កាហ្សាឡើងវិញ នៅក្នុងករណីដែលក្រុមហាម៉ាសយល់ព្រម លើកិច្ចព្រមព្រៀងសន្តិភាព។

កិច្ចចរចាដោយប្រយោល រវាងអ៊ីស្រាអែល និងក្រុមហាម៉ាស បានបន្តសម្រាប់ថ្ងៃទី២ នៅទីក្រុងមាត់សមុទ្រអេហ្ស៊ីប Sharm El Sheikh ខណៈដែលខួបលើកទី២ នៃការវាយប្រហារបង្ហូរឈាមដោយក្រុមហាម៉ាសនៅថ្ងៃទី៧ ខែតុលា ឆ្នាំ២០២៣ ត្រូវបានប្រារព្ធឡើងទូទាំងប្រទេសអ៊ីស្រាអែល។ 

ក្នុងអំឡុងពេលការសម្លាប់រង្គាលនោះ ក្រុមសកម្មប្រយុទ្ធហាម៉ាស បានផ្ដាច់ជីវិតមនុស្សប្រហែល ១.២០០នាក់ និងបានចាប់ជាចំណាប់ថ្នូរ ២៥០នាក់។ ហើយក្នុងរយៈពេល ២ឆ្នាំចាប់តាំងពីពេលនោះមក អាជ្ញាធរសុខាភិបាល នៅតំបន់ហ្កាហ្សា បានរាយការណ៍ថា ជនជាតិប៉ាឡេស្ទីនជាង ៦៧.០០០នាក់ ត្រូវបានសម្លាប់ នៅក្នុងការវាយប្រហាររបស់អ៊ីស្រាអែលទូទាំងតំបន់នេះ។

នាយករដ្ឋមន្ត្រីអ៊ីស្រាអែល លោក Benjamin Netanyahu បានយល់ព្រម ចំពោះផែនការសន្តិភាព ២០ចំណុចរបស់លោក Trump សម្រាប់តំបន់ហ្កាហ្សា ខណៈដែលក្រុមហាម៉ាស បានបង្ហាញការគាំទ្រជាគោលការណ៍ ចំពោះសំណើនេះ ប៉ុន្តែបានទាមទារឲ្យមានការចរចាបន្ថែមទៀត ជុំវិញបញ្ហាសំខាន់ៗ។ ក្តីបារម្ភមួយ សម្រាប់ក្រុមសកម្មប្រយុទ្ធនេះ គឺថា អ៊ីស្រាអែលអាចនឹងត្រលប់ទៅបង្កសង្គ្រាមដ៏ខ្លាំងក្លារបស់ខ្លួនវិញ នៅតំបន់ហ្កាហ្សា ទាំងការទម្លាក់គ្រាប់បែកពីលើអាកាស និងបាញ់ផ្លោងនៅដី នៅពេលដែលចំណាប់ថ្នូរអ៊ីស្រាអែលនៅសល់ ត្រូវបានបញ្ជូនត្រលប់ទៅវិញ។ 

ដោយថ្លែងពីទីក្រុង Washington DC លោក Trump បានព្យាយាមសម្រាលការភ័យខ្លាចទាំងនោះ នៅពេលត្រូវបានសួរថា តើការធានាអ្វីខ្លះដែលលោកនឹងផ្តល់ឲ្យរដ្ឋអារ៉ាប់ អំពីសន្តិភាពយូរអង្វែងនោះ។ លោកបានប្រាប់អ្នកសារព័ត៌មាននៅក្នុងការិយាល័យ Oval Office ថា៖ «មែនហើយ ការធានាចម្បង គឺនៅពេលដែលកិច្ចព្រមព្រៀងនេះកើតឡើង ប្រសិនបើវាកើតឡើង អំឡុងការចរចា នាពេលនេះ យើងនឹងធ្វើអ្វីគ្រប់យ៉ាងដែលអាចធ្វើបាន»។

នៅមុននេះ ក្រុមហាម៉ាសបានទទូចថា ខ្លួននឹងដោះលែងចំណាប់ថ្នូនៅសល់ទាំងអស់ ប្រសិនបើអ៊ីស្រាអែលដកកងកម្លាំងទាំងអស់ចេញពីតំបន់ហ្កាហ្សាភ្លាមៗ។ ផែនការសន្តិភាពរបស់ Trump តាមដែលបានបញ្ជាក់ បង្ហាញពីការដោះលែងអ្នកជាប់ឃុំទាំងអស់ ក្នុងរយៈពេល ៧២ម៉ោងដំបូង បន្ទាប់ពីកិច្ចព្រមព្រៀងត្រូវបានឈានដល់។ 

ប៉ុន្តែវាគ្រាន់តែបញ្ជាក់ពីការដកទ័ពអ៊ីស្រាអែលជាដំណាក់កាល និងដោយផ្នែកប៉ុណ្ណោះ ស្របតាមការទទូចរបស់លោក Netanyahu ដែលថា សន្តិសុខរបស់ប្រទេសលោក អាចត្រូវបានធានា លុះត្រាតែមានវត្តមានយោធា នៅតាមខ្សែបន្ទាត់ព្រំដែនប៉ុណ្ណោះ៕